سعودی عرب ، عمرہ زائرین اور عازمین حج کی رہنمائی کے لیے نیا پورٹل لانچ

جمعرات 20 مارچ 2025 16:39

ریاض(اُردو پوائنٹ اخبارتازہ ترین - این این آئی۔ 20 مارچ2025ء)سعودی عرب کی وزارت حج نے عمرہ زائرین اور عازمین حج کی رہنمائی کے لیے آگاہی پورٹل لانچ کیا ہے جس کے ذریعے اہم موضوعات پر 180 سے زیادہ مفید معلومات فراہم کی جارہی ہیں۔میڈیارپورٹس کے مطابق وزارت حج وعمرہ کی جانب سے دنیا بھر سے آنے والے زائرین کو فراہم کی جانے والی خدمات اور مسجد الحرام کے بارے میں مختلف زبانوں میں جدید ٹیکنالوجی کا استعمال کرتے ہوئے وڈیو اور آڈیو کے ذریعے معلومات پہنچانے کا اہتمام کیا ہے۔

آگاہی پورٹل پر 580 منٹ کی ایجوکیشنل وڈیوز، 16 معلوماتی شاٹس، 365 آگاہی پروگرام، 220 تعلیمی چارٹس اور 12 تعلیمی پروگرامز 8 زبانوں میں پیش کیے جائیں گے جن میں انگلش، فرانسی، فارسی ، انڈونیشی، ہوساوی شامل ہیں۔

(جاری ہے)

پورٹل کا مقصد ارض حرمین آنے والے زائرین کو حرمین کے علاوہ مشاعر مقدسہ ( منی، عرفات اور مزدلفہ)کے بارے میں اہم معلومات کی فراہمی اور یہاں مہیا کی جانے والی خدمات سے درست طورپر متعارف کرانا ہے تاکہ وہ اپنے سفر عمرہ یا حج کو بہتر طریقے سے مکمل کرسکیں۔

پورٹل پر جہاں مقامات مقدسہ کے بارے میں آگاہی فراہم کی جائے گی وہاں زائرین کو مملکت میں قیام کے دوران محتلف نوعیت کی سروسز کے بارے میں بھی معلومات دی جائیں گی جن میں صحت خدمات ، مالیاتی امور، قانونی معلومات وغیرہ شامل ہیں۔