دبئی پولیس نے جعلی کمپنیاں بنا کر فراڈ کرنے والے گروہ کو پکڑ لیا

کارروائی شراکت داروں کے تعاون سے مسلسل نگرانی کی کوششوں کے بعد ہوئی،بیان

پیر 15 ستمبر 2025 15:02

دبئی پولیس نے جعلی کمپنیاں بنا کر فراڈ کرنے والے گروہ کو پکڑ لیا

دبئی(اُردو پوائنٹ اخبارتازہ ترین - این این آئی۔ 15 ستمبر2025ء)متحدہ عرب امارات کی سیکورٹی حکام نے فراڈ کرنے والے ایک گروہ کو گرفتار کر لیا ہے جو جعلی کمپنیاں بناتا تھا تاکہ چوری شدہ بینک کارڈز کا استعمال کرتے ہوئے غیر قانونی مالیاتی کارروائیوں سے حاصل ہونے والی رقم کو منتقل کر سکے۔ میڈیارپورٹس کے مطابق دبئی پولیس نے واضح کیا کہ اس گروہ نے ایسی کاروباری کمپنیاں رجسٹر کی تھیں جن کا درحقیقت مارکیٹ میں کوئی وجود نہیں تھا اور انہیں ریگولیٹری اداروں اور بینکوں کو گمراہ کرنے کے لیے استعمال کیا جاتا تھا تاکہ غیر قانونی مالیاتی منتقلیوں کے ذریعے رقم کے ذرائع کو چھپایا جا سکے اور غیر قانونی طریقے سے فائدہ اٹھایا جا سکے۔

دبئی پولیس نے ان کے فراڈ کے طریقوں کو بے نقاب کیا اور گروہ کے ارکان کو گرفتار کر کے متعلقہ عدالتی حکام کے حوالے کر دیا۔

(جاری ہے)

دبئی پولیس نے مزید کہا کہ یہ کارروائی شراکت داروں کے تعاون سے محتاط نگرانی اور مسلسل نگرانی کی کوششوں کے بعد ہوئی۔ دبئی پولیس نے اس بات پر بھی زور دیا ہے کہ یہ گرفتاری فراڈ کے منظم جرائم سے نمٹنے اور مالی اور اقتصادی نظام کو کسی بھی غیر قانونی سرگرمیوں سے بچانے کے لیے اس کی تیاری کو ظاہر کرتی ہے۔ دبئی پولیس نے افراد اور اداروں سے "عین الشرطہ" سروس یا 901 کال سینٹر کے ذریعے کسی بھی مشکوک سرگرمی کی اطلاع دینے کی اپیل کی ہے۔