اسلام آباد ڈسٹرکٹ جوڈیشری کیلئے قائم ججز ٹریبیونل تبدیل

صدر مملکت کی منظوری سے وفاقی وزارت قانون وانصاف نے نوٹفکیشن بھی جاری کردیا

جمعرات 20 مارچ 2025 22:05

اسلام آباد(اُردو پوائنٹ اخبارتازہ ترین - این این آئی۔ 20 مارچ2025ء)اسلام آباد کی ضلعی عدلیہ کیلئے ہائی کورٹ کے جسٹس طارق محمود جہانگیری کی سربراہی میں قائم ٹریبیونل کو تبدیل کرکے نیا ٹریبیونل تشکیل دے دیا گیا۔صدرمملکت کی منظوری سے اسلام آباد کی ضلعی عدلیہ کیلئے تشکیل پانے والے نئے ٹریبیونل کا نوٹیفکیشن جاری کردیا گیا ہے۔

(جاری ہے)

وزارت قانون و انصاف کی جانب سے جاری نوٹیفکیشن کے مطابق اسلام آباد ہائی کورٹ میں ٹرانسفر ہو کر آنے والے جسٹس خادم حسین سومرو ٹریبیونل کے چیئرمین ہوں گے، جسٹس محمد اعظم خان اور جسٹس انعام امین منہاس بھی ٹریبیونل کے دیگر اراکین کے طور پر شامل ہوں گے۔

اس سے قبل اسلام آباد ہائی کورٹ کے جسٹس طارق جہانگیری کی سربراہی میں ضلعی عدلیہ کیلیے ٹریبیونل قائم تھا جس کو اب تبدیل کر دیا گیا ہے، اس ٹریبیونل میں جسٹس بابر ستار اور جسٹس سردار اعجاز اسحق خان بھی شامل تھے۔اسلام آباد ہائی کورٹ کے جسٹس کی سربراہی میں ٹریبیونل اسلام آباد کی ضلعی عدلیہ کے سروس معاملات کیلئے قائم ہے۔