یونیورسٹی کے قریب آئس، نشہ آور گولیاں بیچنے والے ملزمان گرفتار

جمعہ 21 مارچ 2025 14:47

اٹک (اُردو پوائنٹ اخبارتازہ ترین - این این آئی۔ 21 مارچ2025ء)اینی نارکوٹکس فورس (اے این ایف) نے اٹک میں یونیورسٹی کے قریب آئس اور نشہ آور گولیاں بیچنے والے 2 ملزمان کو گرفتار کرلیا۔ترجمان اے این ایف کے مطابق مختلف کارروائیوں میں 6 ملزمان کو گرفتار کرکے 29 کروڑ روپے سے زائد کی 618.223 کلو گرام منشیات برآمد کی گئی۔ اٹک میں یونیورسٹی کے قریب 2 ملزمان کے قبضے سے 500 گرام آئس اور 300 عدد نشہ آور گولیاں برآمد ہوئیں۔

گرفتار ملزمان نے تعلیمی اداروں کے طلباء کو منشیات فروخت کرنے کا اعتراف کیا۔

(جاری ہے)

چاغی میں ذاکر کیمپ کے قریب اسمگلنگ کے لئے چھپائی گئی 427 کلو افیون، 1 کلو مارفین اور 18 کلو چرس برآمد کی گئی۔ بلوچستان میں چمن کے علاقے کچی آبادی سے 92 کلو مارفین برآمد ہوئی۔ پشین میں کچلاک کے قریب پہاڑی علاقے میں چھپائی گئی 59 کلو ہیروئن برآمد کی گئی۔ترجمان اے این ایف کے مطابق ترکی ٹول پلازہ جی ٹی روڈ سوہاوہ جہلم کے قریب گاڑی سے 12 کلو چرس برآمد کر کے 2 ملزمان کو گرفتارکیا گیا۔ شیر شاہ ٹول پلازہ ملتان کے قریب ملزم کے بیگ سے 5 کلو آئس برآمد ہوئی۔ ملزم کو موقع پر گرفتارکیا گیا۔ گرفتار ملزمان سے انسداد منشیات ایکٹ کے تحت تفتیش کا آغاز کردیا گیا ہے۔