پنجاب یونیورسٹی انسٹیٹیوٹ آف کیمیکل انجینئرنگ اینڈ ٹیکنالوجی کے زیر اہتمام کیرئیر کونسلنگ پر سیمینار

جمعہ 21 مارچ 2025 14:51

لاہور (اُردو پوائنٹ اخبارتازہ ترین - این این آئی۔ 21 مارچ2025ء)پنجاب یونیورسٹی انسٹیٹیوٹ آف کیمیکل انجینئرنگ اینڈ ٹیکنالوجی کے زیر اہتمام کیمیکل انجینئرنگ، انرجی/ماحولیاتی انجینئرنگ اور انڈسٹریل انجینئرنگ کے طلباء کے لیے ’پروسیس/آپریشنز سیفٹی اینڈ مینجمنٹ میں مواقع کے لیے کیریئر کونسلنگ‘ کے موضوع پر سیمینار کا انعقاد کیاگیا۔اس موقع پر ڈائریکٹر کیمیکل انجینئرنگ اینڈ ٹیکنالوجی پروفیسر ڈاکٹر سید نادر حسین، انجینئر ارسلان باری ارسلان، سیمینارکو آرڈینیٹرڈاکٹر ایاز محمد، فیکلٹی ممبران اور طلباء نے شرکت کی۔

اپنے خطاب میں ڈاکٹر سید نادر حسین نے مہمان مقرر کو خوش آمدید کیا اور طلباء کے ساتھ اپنے تکنیکی اور پیشہ ورانہ تجربات روشناس کرانے پر شکریہ ادا کیا۔

(جاری ہے)

انجینئر ارسلان باری نے طلباء کے ساتھ بات چیت کرتے ہوئے سماجی اور صنعتی زندگی میں حفاظت کے مختلف پہلوؤں کی اہمیت اور پراسیس سیفٹی اور مینجمنٹ کے بارے میں سیکھنے میںمسلسل دلچسپی کے ذریعے مہارتوں کو فروغ دینے کے بارے میں بتایا۔

انہوں نے طلباء کو خلیج، چین اور دیگر خطوں کی مختلف کمپنیوں میں مشترکہ مواقع سے زیادہ سے زیادہ فائدہ اٹھانے کی ترغیب دی۔ڈاکٹر ایاز محمد نے مختلف صنعتوں خاص طور پر تیل اور گیس کے شعبے میں پراسیس سیفٹی کے شعبے میں اپنے پیشہ ورانہ/تکنیکی تجربے اور عالمی اداروں اور خاص طور پر خلیج میں ملازمتوں کے حصول کے بڑے مواقع فراہم کرنے پر مقرر کی کوششوں کو سراہا۔