پرفیوم کے نام پر تنازعہ؛ رجب بٹ نے قرآن پر ہاتھ رکھ کر معافی مانگ لی

میرے ان الفاظ سے اگر کسی بھی مسلمان کی دل آزاری ہوئی ہے تو میں آپ سب سے بھی معافی مانگتا ہوں، میں اس پرفیوم کی فروخت بند کر رہا ہوں؛ یوٹیوبر کا ویڈیو بیان

ساجد علی منگل 25 مارچ 2025 14:22

پرفیوم کے نام پر تنازعہ؛ رجب بٹ نے قرآن پر ہاتھ رکھ کر معافی مانگ لی

لاہور ( اُردو پوائنٹ اخبارتازہ ترین۔ 25 مارچ 2025ء ) یوٹیوبر رجب بٹ نے اپنے نئے پرفیوم کے نام پر تنازعہ پیدا ہونے کے بعد معافی مانگ کر اس کی فروخت بند کرنے کا اعلان کردیا۔ تفصیلات کے مطابق اس حوالے سے رجب بٹ نے اپنا ایک ویڈیو بیان جاری کیا، ویڈیو میں انہیں قرآن شریف ہاتھ رکھے دیکھا گیا، رجب بٹ نے اپنے ویڈیو بیان میں قرآن شریف پر ہاتھ رکھ کر معافی مانگی۔

انہوں نے کہا کہ پرفیوم کی تشہیر کے دوران مجھ سے جو لا علمی کے طور پر غلط الفاظ کا استعمال ہوا میں اس کے لیے اللّٰہ اور اس کے رسول ﷺ کی بارگاہ میں کھڑا ہو کر معافی مانگتا ہوں اور توبہ کرتا ہوں، میرے ان الفاظ سے اگر کسی بھی مسلمان کی دل آزاری ہوئی ہے تو میں آپ سب سے بھی معافی مانگتا ہوں، میں اس پرفیوم کی فروخت بند کر رہا ہوں، میں اس پرفیوم کو ختم کر رہا ہوں۔

(جاری ہے)

بتایا جارہا ہے کہ یوٹیوبر رجب بٹ کیخلاف مذہبی جذبات مجروج کرنے پر مقدمہ درج کیا گیا، مقدمے میں پیکا ایکٹ اور 295 اے کی دفعات شامل کی گئی ہیں، مقدمہ سید حیدر علی شاہ نامی شہری کے بیان پر درج کیا گیا، رجب بٹ کے خلاف ایف آئی آر میں نیا پرفیوم متعارف کرانے کا ذکر کیا گیا ہے جس پر مختلف حلقوں کی جانب سے ردعمل دیا گیا تھا اور اب لاہور پولیس نے یوٹیوبر رجب بٹ کے خلاف مقدمے میں پیکا ایکٹ اور جذبات مجروج کرنے کی دفعات بھی شامل کی ہیں، یوٹیوبر کے خلاف مذکورہ مقدمہ لاہور کے تھانہ نشترکالونی میں درج کیا گیا اور پولیس کا کہنا تھا کہ ’مقدمہ کے اندراج کے بعد مزید تحقیقات شروع کردی گئی ہیں، ملزم کیخلاف قانون کے مطابق کارروائی عمل میں لائی جائے گی‘۔