ٌ گورنمنٹ کالج یونیورسٹی ‘ لاہورمیں تحریک پاکستان کی نادر ونایاب تصاویر کی نمائش کا انعقاد

Wلاہور (اُردو پوائنٹ اخبارتازہ ترین - آن لائن۔ 25 مارچ2025ء) ادارہٴ نظریہٴ پاکستان کے زیر اہتمام گورنمنٹ کالج یونیورسٹی‘ لاہور میں تحریک پاکستان کی نادر ونایاب تصاویر کی نمائش کا انعقاد کیا گیا۔اس تصویری نمائش کا افتتاح وائس چانسلر گورنمنٹ کالج یونیورسٹی پروفیسر ڈاکٹر محمد علی نے کیاجبکہ اس موقع پر شعبہ پولیٹیکل سائنس کی چیئرپرسن ڈاکٹر فوزیہ غنی‘ یونیورسٹی کے چیف لائبریرین محمد نعیم ‘ سیکرٹری ادارہٴ نظریہٴ پاکستان ناہید عمران گل ‘ ایڈیشنل سیکرٹری محمد سیف اللہ چوہدری ‘ ڈپٹی سیکرٹری تحریک پاکستان ورکرز ٹرسٹ حافظ عثمان احمد ‘ کوآرڈی نیٹر پاکستان آگہی پروگرام پروفیسر زاہد جاوید شیخ‘ اساتذہ کرام سمیت طلبہ و طالبات کی بڑی تعداد موجود تھی۔

معزز مہمانوں نے تصویری نمائش کا وزٹ کیا اور ادارہٴ نظریہٴ پاکستان کی کاوشوں کو سراہتے ہوئے کہا یہ ادارہ وطن عزیز کے بنیادی نظریہ کی ترویج و اشاعت کیلئے گرانقدر خدمات انجام دے رہا ہے۔

(جاری ہے)

پروفیسر ڈاکٹر محمد علی کا کہنا تھا کہ ہر سال 23 مارچ کے موقع پر ادارہٴ نظریہٴ پاکستان کے اشتراک سے اس تصویری نمائش کا انعقاد کیا جاتا ہے ادارہ کی کلیکشن بہت بہترین ہے ‘ہمارا مقصد ہے کہ نئی نسل کو اپنے قومی ورثہ اور تحریک پاکستان کی تاریخ سے روشناس کرایا جا سکے۔

مسلم لیگ اور تحریک پاکستان کی پوری تاریخ اس نمائش میں موجود ہے جو نوجوان نسل کے لیے ایک بہترین کاوش ہے۔ ان کا کہنا تھا کہ لاہور شہر کے طلبہ و طالبات کو بھی اس طرح کی نمائش دیکھنی چاہیے تاکہ وہ اپنی تاریخ سے واقف ہو سکیں ۔ ہمیں اپنے نیشنل ہیریٹیج اور تاریخ پر فخر کرنا چاہیے۔ ناہید عمران گل کا کہنا تھا اس نمائش کا مقصد نوجوان نسل کو قیام پاکستان کی خاطر دی جانیوالی قربانیوں اور تحریک پاکستان کے اہم تاریخی واقعات سے آگہی فراہم کرنے کے ساتھ ساتھ مشاہیر تحریک پاکستان کی حیات وخدمات سے آگاہ کرنا ہے۔

محمد سیف اللہ چوہدری نے کہا کہ ایسی نمائشوں کے انعقاد کا مقصد نئی نسل کو وطن عزیز کی خاطر دی جانیوالی قربانیوں سے آگہی فراہم کرنا ہے۔ آزادی اللہ تعالیٰ کی بہت بڑی نعمت ہے اور ہمیں اس کی قدر کرنی چاہئے۔ طلبہ وطالبات نے نمائش میں رکھی گئی تصاویر میں گہری دلچسپی کااظہار کیا جبکہ انہیں تاریخی تصاویر کے پس منظر سے بھی آگاہ کیا گیا۔ ناہید عمران گل نے پروفیسر ڈاکٹر محمد علی کو ادارہ کی مطبوعات کا ایک سیٹ بھی پیش کیا۔