شوال 1446 ہجری کے چاند کی پہلی تصویر جاری کردی گئی

سعودی عرب اور متحدہ عرب امارات سمیت کئی خلیجی ریاستوں میں آج عید ہے

ساجد علی اتوار 30 مارچ 2025 11:53

ابوظہبی ( اُردو پوائنٹ اخبارتازہ ترین۔ 30 مارچ 2025ء ) شوال 1446 ہجری کے چاند کی پہلی تصویر جاری کردی گئی۔اماراتی میڈیا کے مطابق متحدہ عرب امارات کے فلکیات کے مرکز نے رمضان کے مقدس مہینے کے اختتام اور ملک میں عید الفطر کے آغاز کے موقع پر شوال کے چاند کی پہلی سرکاری تصویر جاری کردی، یہ تصویر اتوار 30 مارچ کو ابوظہبی میں اس وقت لی گئی جب چاند کو مقامی وقت کے مطابق صبح 7 بج کر 30 منٹ پر الخاتم آسٹرونومیکل آبزرویٹری میں دیکھا گیا۔

بتایا جارہا ہے کہ گزشتہ روز سعودی عرب شوال 1446 ہجری کے چاند کی رویت کا اعلان کرنے والا دنیا کا پہلا ملک تھا، جس کے بعد متحدہ عرب امارات، قطر اور کویت میں بھی شوال کا چاند نظر آگیا جس کے نتیجے میں سعودی عرب اور متحدہ عرب امارات سمیت کئی خلیجی ریاستوں میں شوال کا چاند نظر آنے کے بعد متحدہ عرب امارات، قطر، کویت اور بحرین سمیت زیادہ تر خلیجی ممالک میں آج عید ہے۔

(جاری ہے)

اس حوالے سے سعودی عرب میں عید الفطر کی نماز کے بڑے اجتماعات مسجد الحرام اور مسجد نبوی ﷺ اور مسجد اقصیٰ میں منعقد ہوئے، مسجد الحرام میں نماز عید کی امامت الشیخ عبدالرحمن السدیس نے کی جب کہ مسجد نبوی ﷺ میں نمازعید شیخ عبداللہ کی امامت ادا کی گئی جہاں لاکھوں افراد نے نماز عید ادا کی، عیدالفطر کے خطبے کے بعد عالم اسلام کی سلامتی اور خوشحالی کے لیے خصوصی دعائیں کی گئیں، اسی طرح فلسطینیوں کی بڑی تعداد نے مسجد الاقصیٰ میں عید کی نماز ادا کی جب کہ امریکہ، برطانیہ، فرانس اور ترکیہ میں بھی آج عید منائی جا رہی ہے۔

بتایا گیا ہے کہ ایران، عمان، انڈونیشیا، ملائیشیا، برونائی، آسٹریلیا، بھارت اور بنگلادیش میں چاند نظر نہ آنے کے باعث پیر کے روز عیدالفطر منانے کا اعلان کیا گیا ہے، یونان سمیت یورپ بھر میں بھی کل عید الفطر منائی جائے گی، یونان میں سرکاری طور پر اعلان کر دیا گیا، آسٹریا کی اسلامی نظریاتی کونسل نے بھی کل عید منانے کا اعلان کیا ہے۔