کرناٹک ، وزراء نے وقف ترمیمی بل کیخلاف بطور احتجاج بازوئوں پر سیاہ پٹیاں باندھ کر عید نماز ادا کی

بدھ 2 اپریل 2025 17:50

بنگلور و (اُردو پوائنٹ اخبارتازہ ترین - این این آئی۔ 02 اپریل2025ء)بھارتی ریاست کرناٹک میں وزرا اور انکے حامیوں نے مجوزہ وقف ترمیمی بل کے خلاف بطور احتجاج بازوئوں پر سیاہ پٹیاں باندھ کو عید الفطر کی نماز ادا کی۔قبل ازیں مسلم پرسنل لابورڈ نے بھارت بھر کے مسلمانوںسے جمعتہ االوداع اور عید الفطر کی نماز کے موقع پر بازوئوں پر سیاہ پٹی باندھ کر وقف ترمیمی بل کے خلاف پرامن احتجاج کرنے کی اپیل کی تھی۔

(جاری ہے)

کشمیر میڈیاسروس کے مطابق کرناٹک کے وزیر برائے وقف اور سیاحت ضمیر احمد خان اور وزیر میونسپل ایڈمنسٹریشن اور حج رحیم خان نے سینکڑوں مسلمانوں کیساتھ بنگلور اور بیدر میں نمازعید ادا کی۔ اس دوران انہوںنے بازوئوں پر سیاہ پٹیاں بندھ رکھی تھیں ۔ انہوںنے مودی کی مرکزی حکومت کی طرف سے لائے جانے والے وقف ترمیمی بل کے خلاف خاموش احتجاج کیا ۔ انہوںنے اس موقع پر فرقہ وارانہ ہم آہنگی پر زور دیا۔انہوںنے کہا کہ وقف ترمیمی بل ایک سازش ہے جسکے خلاف کرناٹک حکومت پہلے ہی اپنا ایک واضح موقف دے چکی ہے اور ہم نے اسکی حمایت نہ کرنے کا فیصلہ کیا ہے۔ یاد رہے کہ کرناٹک میں کانگریس کی حکومت ہے۔