Live Updates

اسرائیل کا غزہ کے لوگوں کو جرمنی منتقل کرنے کا اعلان، جرمنی کی تردید

بدھ 2 اپریل 2025 17:50

برلن(اُردو پوائنٹ اخبارتازہ ترین - این این آئی۔ 02 اپریل2025ء)جرمنی نے اسرائیلی وزارت داخلہ کی غزہ کے لوگوں کو جرمنی منتقل کرنے کے اعلان بارے خبروں کی تردید کی ہے۔غیر ملکی میڈیا کے مطابق جرمن وزارت خارجہ نے ایکس پلیٹ فارم پر سرکاری اکائونٹ سے جاری پوسٹ میں واضح کیا کہ درحقیقت 19 جرمن شہریوں اور ان کے اہل خانہ کو غزہ سے جرمنی منتقل کیا گیا ہے۔

جرمنی نے ان 19شہریوں کی منتقلی میں تعاون پر تل ابیب حکومت کا شکریہ بھی ادا کیا۔

(جاری ہے)

اس سے قبل اسرائیلی وزارت داخلہ نے اپنے بیان میں کہا تھا کہ منگل کے روز غزہ کے سینکڑوں باسیوں کو جنوبی اسرائیل میں رامون ہوائی اڈے سے طیارے کے ذریعے جرمنی کے شہر لائبزیگ پہنچا دیا گیا،ان افراد کے ہمراہ جرمن سفارت کار بھی تھے۔اسرائیلی کابینہ نے حال ہی میں ایک نئی کمیٹی بنانے کی منظوری دی تھی جو غزہ سے فلسطینیوں کے "رضاکارانہ کوچ کا عمل تیز کرنے کی ذمے دار ہو گی۔

اس کا مقصد غزہ کو خالی کرنے اور اس کی تعمیر نو سے متعلق امریکی صدر ڈونلڈ ٹرمپ کی تجویز کے ساتھ ہم آہنگی ہے۔اسرائیلی وزارت دفاع کے مطابق مذکورہ نئی کمیٹی مقصود ممالک کی جانب زمینی ، سمندری اور فضائی راستے سے کوچ میں ہم آہنگی پیدا کرے گی۔