چینی افواج کی تائیوان کے ارد گرد حالیہ مشق ضروری ،انصاف پر مبنی عمل ہے، ترجمان امور تائیوان

بیجنگ (اُردو پوائنٹ اخبارتازہ ترین - این این آئی۔ 03 اپریل2025ء)چین نے کہاہے کہ چینی افواج کی تائیوان کے ارد گرد حالیہ مشق ضروری ،انصاف پر مبنی عمل ہے۔تائیوان امور کے دفتر کی ترجمان ژو فینگ لیئن نے سوال کہ چین کی پیپلز لبریشن آرمی کے مشرقی تھیٹر کمانڈ نے حال ہی میں تائیوان جزیرے کے اردگرد مشترکہ فوجی مشقیں کی ہیں جبکہ تائیوان کی ڈیموکریٹک پروگریسو پارٹی کی انتظامیہ نے دعوی کیا ہے کہ یہ اقدام آبنائے تائیوان کے تنا ئوکو بڑھاتا ہے، علاقائی امن و استحکام کو شدید نقصان پہنچاتا ہے، اور عالمی سلامتی کیلئے خطرہ ہے جبکہ امریکی وائٹ ہائوس کے ترجمان نے بھی کہا ہے کہ وہ کسی بھی یکطرفہ طاقت یا دبا کے ذریعے موجودہ صورت حال کو تبدیل کرنے کے خلاف ہیں کا جواب دیتے ہوئے ترجمان نے کہا کہ پیپلز لبریشن آرمی کا تائیوان جزیرے کے اردگرد مشترکہ فوجی مشقیں کرنا اورآبنائے تائیوان کے وسطی اور جنوبی حصوں میں "اسٹریٹ تھنڈر-2025A" مشقیں منعقد کرنا، چین کی خودمختاری، سلامتی اور ترقی کے مفادات کے تحفظ کا ایک ضروری اقدام ہے۔

(جاری ہے)

یہ ملک کی تقسیم کی سازشوں کو سزا دینے کا انصاف پر مبنی عمل ہے، اورآبنائے تائیوان کے امن و استحکام اور تائیوان کے ہم وطنوں کی سلامتی اور بہبود کو یقینی بنانے کی مضبوط عکاسی کرتا ہے۔ دنیا میں صرف ایک چین ہے، اور تائیوان چین کا اٹوٹ حصہ ہے،یہی آبنائے تائیوان کی حقیقی موجودہ صورت حال ہے۔ ڈی پی پی حکام "تائیوان کی علیحدگی " کے جھوٹے نظریات کو پھیلا رہے ہیں اور مسلسل چیلنجز پیدا کر رہے ہیں، جو "ایک چین کے اصول" کی حقیقت کو بدلنے کی بے بنیاد خواہش ہے۔

یہ عمل آبنائے تائیوان کے امن و استحکام کو شدید نقصان پہنچا رہا ہے اور تائیوان کے ہم وطنوں کے مفادات اور فلاح و بہبود کو بری طرح متاثر کر رہا ہے۔ اگر انہیں روکا نہ گیا تو یہ تائیوان کے عوام کو جنگ کی تباہ کاریوں کی طرف دھکیل دیں گے۔ لہذا، ان اقدامات کو سختی سے روکنا اور انہیں سزا دینا ضروری ہے۔ تائیوان کا مسئلہ مکمل طور پر چین کا داخلی معاملہ ہے اور اس میں کسی بھی بیرونی مداخلت کی اجازت نہیں دی جائے گی۔ امریکہ کو ایک چین کے اصول اور تین چین-امریکہ مشترکہ اعلامیوں کی پابندی کرنی چاہیے، "تائیوان کی علیحدگی" کی مخالفت کرنی چاہیے، اور چین کے اتحاد کی حمایت کرنی چاہیے۔