پشاور ہائیکورٹ نے محکمہ صحت خیبر پختونخوا کا کروڑوں روپے مالیت کا ٹینڈر کالعدم قرار دے دیا

جمعہ 4 اپریل 2025 15:55

پشاور (اُردو پوائنٹ اخبارتازہ ترین - اے پی پی۔ 04 اپریل2025ء) پشاور ہائیکورٹ نے محکمہ صحت خیبر پختونخوا کے کروڑوں روپے مالیت کا ٹینڈر کالعدم قرار دیتے ہوئے حکم جاری کیا ہے کہ ادویات کی خریداری کا عمل ازسرنو قانون کے مطابق شروع کیا جائے۔خیبرپختونخوا میں ادویات خریداری ٹینڈر کیس پر پشاور ہائیکورٹ کے جسٹس ارشد علی اور جسٹس خورشید اقبال پر مشتمل دو رکنی بینچ نے حکم نامہ جاری کر دیا۔

سماعت کے دوران درخواست گزار شمائل احمد بٹ کے وکیل نے عدالت کو بتایا کہ فرنٹیئر ڈیکسٹوز لمیٹڈ کو جعلی اور غیر معیاری ادویات پر بلیک لسٹ کیا گیا ہے۔

(جاری ہے)

انہوں نے مزید بتایا کہ بلیک لسٹڈ کمپنی کو ادویات کی فراہمی کا ٹھیکہ دیناانسانی جانوں سے کھیلنے کے مترادف اور سرکاری ہسپتالوں میں ادویات کی فراہمی کا ٹھیکہ دینا بنیادی حقوق کی خلاف ورزی ہے، جعلی ادویات کی روک تھام کے لیے ٹیسٹنگ لیبارٹریوں سے رپورٹس جمع کی گئی ہیں،اس پر عدالت نے محکمہ صحت کے کروڑوں روپے مالیت کے ٹینڈرکو غیر شفاف اور کالعدم قرار دیتے ہوئے کہا کہ ٹینڈر شرائط سے اہم شق جان بوجھ کر حذف کی گئی ہے جو مخصوص کمپنی کو فائدہ پہنچانے کی منظم کوشش ہے، عدالت نے متعلقہ کمپنی کو دیئے گئے ٹینڈر کو فوری منسوخ کرنے کی ہدایت کی اور ادویات کی خریداری کا عمل ازسرنو قانون کے مطابق شروع کرنے کا حکم دیا۔