ایس آئی ایف سی کے تعاون سے سندھ،خیبرپختونخوا ہ میں ہائیڈروکاربن ذخائر کی اہم دریافت

ماڑی انرجیز اور آئل اینڈ گیس ڈویلپمنٹ کمپنی لمیٹڈ نے ہائیڈروکاربن کے نئے ذخائر دریافت کئے

ہفتہ 5 اپریل 2025 17:03

اسلام آباد(اُردو پوائنٹ اخبارتازہ ترین - این این آئی۔ 05 اپریل2025ء)خصوصی سرمایہ کاری سہولت کونسل کے تعاون سے توانائی کے شعبے میں اہم کامیابی حاصل ہوئی ہے۔سندھ اور خیبرپختونخوا ہ میں تیل و گیس کے نئے ذخائر کی دریافت سے ملکی معیشت کو استحکام ملنے کی امید پیدا ہوگئی۔

(جاری ہے)

ماڑی انرجیز اور آئل اینڈ گیس ڈویلپمنٹ کمپنی لمیٹڈ نے ہائیڈروکاربن کے نئے ذخائر دریافت کئے ہیں جن سے ملکی توانائی کے ذخائر میں نمایاں اضافہ متوقع ہے، سندھ میں او جی ڈی سی ایل نے کامیابی کے ساتھ دریافت شدہ کنویں سے پیداوار کی بحالی کا اعلان کیا ہے۔

او جی ڈی سی ایل کے مطابق اس کنویں سے یومیہ 115 بیرل خام تیل، 7 ملین مکعب فٹ گیس اور 21 میٹرک ٹن ایل پی جی حاصل کی جا رہی ہے، یہ کامیابی ایس آئی ایف سی کی رہنمائی اور بین الاقوامی معیار کے مطابق کوششوں کا نتیجہ ہے۔دوسری جانب ماڑی انرجیز نے خیبرپختونخوا ہ کے وزیرستان بلاک میں ہائیڈروکاربن کے نئے ذخائر دریافت کئے ہیں، یہاں سے 23.85 ملین مکعب فٹ یومیہ گیس اور 122 بیرل یومیہ کنڈینسیٹ گیس کی پیداوار کا آغاز ہو چکا ہے، یہ کمپنی کی مسلسل تیسری بڑی دریافت ہے۔