امیت شاہ کے دورہ جموں وکشمیر کیخلاف پاسبان حریت جموں وکشمیر کے زیر اہتمام مظفرآباد میں احتجاجی مظاہرہ

مظفرآباد(اُردو پوائنٹ اخبارتازہ ترین - این این آئی۔ 07 اپریل2025ء)بھارتی وزیر داخلہ امیت شاہ کا دورہ مقبوضہ جموں وکشمیر کیخلاف پاسبان حریت جموں وکشمیر کے زیر اہتمام دارالحکومت مظفرآباد میں احتجاجی مظاہرہ،مظاہرے میں خواتین سمیت شہریوں کی بڑی تعداد نے شرکت کی۔کشمیری مظاہرین نے بینرز اور کتبے اٹھا رکھے تھے جن پر بھارتی وزیر داخلہ کے کشمیر دورے کیخلاف مذمتی جملے درج تھے۔

بھارتی وزیر داخلہ کے کشمیر دورے کیخلاف شہریوں نے سیاہ جھنڈے لہرا کر احتجاج کیا۔کشمیری مظاہرین ’’جس کشمیر کو خون سے سینچا وہ کشمیر ہمارا ہے ‘‘’’ ہم چھین کے لیں گے آزادی‘‘نامنظور نامنظور بھارتی قبضہ نامنظور‘‘جیسے نعرے لگا رہے تھے۔ بھارت مخالف مظاہرے کی قیادت چیئرمین پاسبان حریت عزیر احمد غزالی، وائس چیئرمین عثمان علی ہاشم، پاسبان حریت شعبہ خواتین کی سربراہ مہناز قریشی سیاسی مذہبی جماعتوں کے راہنما کر رہے تھے۔

(جاری ہے)

اس موقع پر احتجاجی مظاہرہ سے خطاب کرتے ہوئے چیئرمین پاسبان حریت عزیر احمد غزالی،ڈائریکٹر کشمیر لبریشن سیل راجہ سجاد لطیف خان ،پیپلزپارٹی کے راہنما شوکت جاویدمیر،سید سلیم شاہ راہنما جماعت اسلامی ،مہناز قریشی سربراہ پاسبان حریت شعبہ خواتین ،محمد اسلم انقلابی،ڈاکٹر محمد منظور ودیگر مقررین نے کہا کہ کشمیری عوام بھارتی وزیر داخلہ کے دورہ کشمیر کو مسترد کرتے ہیں،امیت شاہ 5 اگست 2019 کے دہشت پسندانہ اقدامات کا زمہ دار ہے کشمیری عوام ایسے شخص کو قابلِ نفرت سمجھتے ہیں۔

بھارتی حکمران جان لیں کشمیری عوام بھارت کی جبری فوجی حاکمیت کو کبھی قبول نہیں کریں گے۔ مقررین کا کہنا تھا کہ آزاد کشمیر کے عوام مقبوضہ کشمیر میں بھارتی فوجی قبضے کو مسترد کرتے ہیں۔ آزاد کشمیر کے عوام بھارتیہ جنتا پارٹی کی جانب سے مقبوضہ کشمیر میں جارحیت کو قبول نہیں کرتے۔ امیت شاہ ایک دہشت گرد ہے اسکو کشمیر میں کوئی ویلکم نہیں کریگا۔ کشمیری خواتین بھارتی جبرواسبتداد کے سامنے سیسہ پلائی ہوئی دیوار بن کر آزادی کیلئے کھڑی ہیں۔ کشمیری عوام شہداء کے مقدس مشن کو جاری رکھیں گے۔ امیت شاہ کے دورہ مقبوضہ کشمیر کے خلاف شہریوں نے شہر کی مرکزی شاہراہ پر مارچ کیا۔