نیشنل انسٹی ٹیوٹ آف پبلک ایڈمنسٹریشن کی37 ویں سینئر مینجمنٹ کورس کے شرکاء کا مظفرآباد میں سپریم کورٹ آف آزاد جموں وکشمیر کا دورہ

منگل 8 اپریل 2025 16:46

مظفرآباد(اُردو پوائنٹ اخبارتازہ ترین - این این آئی۔ 08 اپریل2025ء)نیشنل انسٹی ٹیوٹ آف پبلک ایڈمنسٹریشن کی37 ویں سینئر مینجمنٹ کورس کے شرکاء نے آزاد کشمیر کے مطالعاتی دورے کے دوسرے روز دارالحکومت مظفرآباد میں سپریم کورٹ آف آزاد جموں وکشمیر کا دورہ کیا۔ رجسٹرار سپریم کورٹ آزاد جموں وکشمیر مظہر اقبال نے وفد کوآزاد کشمیر میں عدالتی نظام کے تاریخی پس منظر، آزادجموں و کشمیر سپریم کورٹ کی آئینی حیثیت، ڈھانچے، دائرہ کار، سپریم جوڈیشل کونسل کے اختیارات اور ججز کی تعیناتی کے طریقہ کار پر تفصیلی بریفنگ دی۔

اس موقع پر تعارفی نشست کے دوران رجسٹرار سپریم کورٹ آزاد جموں وکشمیر نے مختلف سوالات کے جوابات دئے اور شرکاء نے مختلف امور پر گفتگو و شنید کی۔

(جاری ہے)

اس سے پہلے وفد نے سپریم کورٹ آف آزاد جموں وکشمیر کی لائبریری کا دورہ کیا اور مختلف کتابوں کا مطالعہ کیا۔ وفد نے عدالتی کاروائی مشاہدہ بھی کیا۔ نیشنل انسٹی ٹیوٹ آف پبلک ایڈمنسٹریشن کی37 ویں سینئر مینجمنٹ کورس کے وفد کی سربراہی نیشنل انسٹی ٹیوٹ آف پبلک ایڈمنسٹریشن کے ڈائریکٹنگ سٹاف ڈاکٹر محمد فاروق عدیل کر رہے تھے۔

وفد میں پاکستان ایڈمنسٹریٹو سروسز گروپ کے عبدالشکور، عثمان علی، کنور اعجاز رزاقی، فیڈرل بورڈ آف ریونیو سے محمد عثمان اور محترمہ عطیہ، پولیس سروسز گروپ سے محترمہ عمارہ سلیم، پاکستان آڈٹ اینڈ اکاؤنٹ گروپ سے سید کاشف حسین اور خادم حسین شاہ، پاکستان ریلوے سے جواد علی سومرو، پاکستان پوسٹل سروسز گروپ سے رضوان، پاکستان سیکرٹریٹ سروسز سے ظفر اقبال اور پروونشل مینجمنٹ سروسز کے افضال احمد قمر اور فہیم جان شامل تھے۔

ڈائریکٹنگ سٹاف ڈاکٹر محمد فاروق عدیل نے رجسٹرار سپریم کورٹ آزاد جموں وکشمیر مظفر اقبال کا تعارفی نشست پر شکریہ ادا کیا اوروفد میں شریک ایف بی آر گروپ کے محمد عثمان نے رجسٹرار سپریم کورٹ آزاد جموں وکشمیر مظفر اقبال کو شیلڈ پیش کی۔ اس موقع پر رجسٹرار سپریم کورٹ آزاد جموں وکشمیر نے وفد کے سربراہ کو سپریم کورٹ آف آزاد جموں وکشمیر کی جانب سے سوینئر بھی دیا۔