کل جماعتی حریت کانفرنس کی بھارتی وزیر داخلہ کے جموں و کشمیر کے دورے کی مذمت

منگل 8 اپریل 2025 17:15

سرینگر (اُردو پوائنٹ اخبارتازہ ترین - اے پی پی۔ 08 اپریل2025ء) کل جماعتی حریت کانفرنس نے بھارتی وزیر داخلہ امیت شاہ کے جموں و کشمیر کے دورے کی مذمت کرتے ہوئے اس دورے کو مقبوضہ علاقے میں بھارت کی طرف سے جاری انسانی حقوق کی سنگین خلاف ورزیوں سے عالمی برادری کی توجہ ہٹانے کی ایک کوشش قراردیا ہے ۔کشمیرمیڈیاسروس کے مطابق حریت کانفرنس کے ترجمان ایڈووکیٹ عبدالرشید منہاس نے سرینگر میں جاری بیان میں کہا کہ امیت شاہ کا دورہ جموں و کشمیر میں صورتحال معمول پر آنے کے جھوٹے بیانیہ کو آگے بڑھانے کے لئے رچایاجانے والا ایک ڈرامہ ہے۔

انہوں نے کہاکہ اقوام متحدہ کے تسلیم شدہ متنازعہ علاقے میں بھارتی وزیر داخلہ کی موجودگی روزانہ کی بنیاد پر بھارتی فوج کے ظلم و تشدد کا نشانہ بننے والے کشمیریوں کی توہین بھی ہے ۔

(جاری ہے)

حریت ترجمان نے کہا کہ امیت شاہ کے دورے کا مقصد مقبوضہ علاقے میں آر ایس ایس کے کشمیر اور مسلم مخالف ایجنڈے کو آگے بڑھانا ہے۔انہوں نے مزید کہا کہ کشمیریوں کےلئے بھارتی وزیر داخلہ امیت شاہ کی حیثیت ایک مجرم کی ہے کیونکہ نہتے کشمیریوں پر جاری بھارتی فوجیوں کے مظالم میں ان کا مرکزی کردار ہے ۔

عبدالرشید منہاس نے کہا کہ ظالم وجابر بھارتی حکمرانوں کے مقبوضہ علاقے کے دورے محاصرے کا شکار کشمیریوں کے لئے کوئی اہمیت نہیں رکھتے کیونکہ ان کا واحد مقصد مقبوضہ علاقے کے زمینی حقائق کو مسخ کرنا ہے۔