شاہد آفریدی کی آرمی چیف جنرل عاصم منیر سے ملاقات

سابق کپتان نے پاک فوج کے سربراہ سے ان کی والدہ کے انتقال پر تعزیت کی

ذیشان مہتاب منگل 8 اپریل 2025 15:30

شاہد آفریدی کی آرمی چیف جنرل عاصم منیر سے ملاقات

لاہور (اردو پوائنٹ تازہ ترین اخبار ۔ 8 اپریل 2025ء ) قومی کرکٹ ٹیم کے سابق کپتان شاہد آفریدی نے آرمی چیف جنرل عاصم منیر سے راولپنڈی میں ملاقات کی ہے۔

اس موقع پر 47 سالہ شاہد آفریدی نے آرمی چیف سے ان کی والدہ کے انتقال پر تعزیت کی۔ انہوں نے آرمی چیف جنرل عاصم منیر سے گفتگو میں کہا کہ ملک میں تفریح کا واحد ذریعہ کرکٹ ہے، محسن نقوی ایک محنتی شخص ہیں جو کرکٹ کے لیے خلوص سے کچھ کرنا چاہتے ہیں۔

(جاری ہے)

شاہد آفریدی نے کہا کہ پی سی بی 24/7 والی جاب ہے اس لیے آپ وزارت داخلہ اور پی سی بی میں سے کسی ایک کا انتخاب کریں، محسن نقوی محنتی شخص ہیں لیکن دو کشتیوں میں سوار ہوکر کرکٹ کے لیے وہ نہیں کرسکتے جو وہ چاہتے ہیں۔

سابق ٹیسٹ کپتان نے اس دوران یہ بھی کہا کہ ملک میں تفریح کا واحد ذریعہ کرکٹ ہے، کرکٹ فل ٹائم جاب ہے اس لیے محسن نقوی سے ایک ذمہ داری واپس لی جائے۔

ذرائع کے مطابق گزشتہ سال جون میں امریکا میں ٹی ٹونٹی ورلڈکپ کے دوران محسن نقوی نے شاہد آفریدی کو پی سی بی میں کام کرنے کی پیشکش کی تھی تاہم شاہد آفریدی نے ان سے اپنی مصروفیت کی وجہ سے معذرت کر لی تھی۔