کشمیریوں کےساتھ جو کچھ کیا گیاوہ ناقابل فراموش ،کروڑوں مسلمانوں نے وقف بل مسترد کر دیا ہے، فاروق عبداللہ

بدھ 9 اپریل 2025 14:01

سری نگر (اُردو پوائنٹ اخبارتازہ ترین - اے پی پی۔ 09 اپریل2025ء) بھارت کے غیر قانونی زیر تسلط جموں وکشمیر میں نیشنل کانفرنس کے صدر فاروق عبداللہ نے کہا ہے کہ کشمیر کے لوگوں کے ساتھ جو کچھ کیا گیا وہ ہم کبھی نہیں بھولیں گے، بھارت کے کروڑوں مسلمانوں نے وقف بل کو مسترد کر دیا ہے۔

(جاری ہے)

کشمیر میڈیاسروس کے مطابق فاروق عبداللہ نے سرینگر میں پارٹی کارکنوں سے خطاب کرتے ہوئے کہا کہ کشمیریوں پر خصوصاً 2019کے بعدظلم و ستم کے پہاڑ توڑے گئے اور ایک ایک کر کے ان کے حقوق چھینے گئے ،یہ سب ناقابل فراموش ہے۔

انہوں نے کہا کہ جموں وکشمیر کی تعمیر و ترقی اور عوام کی فلاح و بہبود کےلئے ریاستی درجے کی بحالی ناگزیر ہے۔فاروق عبداللہ نے کہا کہ بھارت کے24کروڑ مسلمانوں نے وقف بل کو مسترد کر دیا ہے کیونکہ یہ بل کسی صورت ان کے حق میں نہیں ۔ انہوں نے امید ظاہر کی کہ عدالت عظمٰی میں مسلمانوں کو انصاف ملے گا۔