علی خان ترین نے دیگر کے ہمراہ ٹلو بنگلہ رحیم یار خان میں ’’سلطان انٹر ہیلتھ سنٹر‘‘کا افتتاح کردیا

بدھ 9 اپریل 2025 23:07

ملتان (اُردو پوائنٹ اخبارتازہ ترین - این این آئی۔ 09 اپریل2025ء)علی خان ترین، رکن قومی اسمبلی مخدوم سید مرتضی محمود اور مخدوم سید عثمان محمود نے ٹلو بنگلہ رحیم یار خان میں ’’سلطان انٹر ہیلتھ سنٹر‘‘کا افتتاح کردیا۔ سلطان انٹر ہیلتھ سنٹر ٹلو بنگلہ میں اہل علاقہ اور دیگر قریبی علاقوں کے مکینوں کے لئے صحت کی بنیادی سہولیات 24گھنٹے مفت فراہم کی جائینگی جبکہ ہیلتھ سنٹر میں مفت چیک اپ و ادویات کی فراہمی کو بھی یقینی بنایا جائے گا۔

ہیلتھ سنٹر میں ڈاکٹرز اور دیگر طبی عملے کے ساتھ ساتھ ایک لیڈی ڈاکٹر بھی مستقل موجود ہونگی۔ اہلیان علاقہ نے ہیلتھ سنٹر کے قیام پر جہانگیر خان ترین، علی خان ترین، مخدوم سید مرتضی محمود اور مخدوم سید عثمان محمود کا شکریہ ادا کیا۔

(جاری ہے)

اس موقع پر علی خان ترین نے خطاب میں کہا کہ رحیم یار خان ہمارا گھر ہے اور ہمیں یہاں کے لوگوں سے بہت پیار ہے۔

سلطان انڑ ہمارے دل کے بہت قریب تھے وہ جلدی چلے گئے اللہ پاک سے دعا ہے کہ انہیں جنت میں اعلی مقام عطا فرمائے۔ علی ترین نے مزید کہا کہ لوگوں کو صحت و تعلیم کی بنیادی سہولیات کی فراہمی ہماری ہمیشہ سے اولین ترجیح رہی ہے۔ مخدوم سید مرتضی محمود اور مخدوم سید عثمان محمود نے اپنے خطاب میں کہا کہ لوگوں کی بے لوث خدمت ہمارا مقصد حیات ہے اور خدمت کا یہ سلسلہ جاری رکھیں گے۔