ایران کے میزائل حملوں میں10افراد ہلاک ‘سینکڑوں زخمی ہوئے ہیں.اسرائیلی حکام

تہران/تل ابیب(اردوپوائنٹ اخبارتازہ ترین-انٹرنیشنل پریس ایجنسی۔15 جون ۔2025 )ایران اور اسرائیل کے درمیان جاری جھڑپیں تیسرے دن میں داخل ہوچکی ہے گزشتہ رات ایران کے میزائل حملوں میں اسرائیل نے10افراد کی ہلاکتوں کی تصدیق کی ہے ایران نے دومراحل میں میزائل حملے کیئے عالمی ذرائع ابلاغ کے مطابق اسرائیلی حکام کا کہنا ہے کہ رات بھر جاری رہنے والے ایرانی میزائل حملوں کے نتیجے میں10 افراد ہلاک اور 100سے زیادہ زخمی ہوئے ہیں.

(جاری ہے)

رپورٹ میں بتایا گیا ہے کہ تل ابیب کے قریبی شہر بیت یام میں چھ افراد ہلاک ہوئے جبکہ سات افراد لاپتہ ہیں امدادی ٹیمیں تباہ شدہ عمارتوں کے ملبے تلے تلاش جاری رکھے ہوئے ہیں اسرائیلی ایمرجنسی سروسز اور مقامی ہسپتال کے مطابق شمالی عرب شہر طمرہ میں بھی چار افراد ایران کے حملوں میں ہلاک ہوئے ہیں. اسرائیلی صدر اسحاق ہرزوگ نے ایران کے حملوں کے بعد سوشل میڈیا پلیٹ فارم ایکس پر لکھا”یہ ایک انتہائی افسوسناک اور مشکل صبح ہے“انہوں نے دعوی کیا کہ ایرانی حملوں میں یہودی اور عرب، اسرائیلی شہری اور نئے آنے والے تارکین وطن، بچوں، خواتین، بزرگوں اور مردوں سمیت متعدد افراد ہلاک اور زخمی ہوئے.

ایران اور اسرائیل کے درمیان کشیدگی تیسرے روز میں داخل ہو چکی ہے اور دونوں جانب سے رات بھر ایک دوسرے پر حملے کیے گئے ایران نے وسطی اور شمالی اسرائیل پر میزائل داغے جبکہ اسرائیلی فوج نے ایران کی جوہری تنصیبات پر کئی فضائی حملوں کی تصدیق کی ہے اسرائیلی حکام نے عوام کو خبردار کیا ہے کہ ملک کو مشکل دنوں کا سامنا کرنا پڑے گا کیونکہ وہ ایران پر حملوں کی ایک غیر معمولی مہم جاری رکھے ہوئے ہیں.

اسرائیل نے کہا ہے کہ یہ کارروائیاں چند دنوں نہیں بلکہ کئی ہفتوں تک جاری رہ سکتی ہیں لیکن اس مہم کا حتمی مقصد تاحال واضح نہیں گذشتہ رات وزیر اعظم بنیامین نیتن یاہو نے کہا کہ اب تک کے حملے ان کارروائیوں کے مقابلے میں کچھ بھی نہیں جو ایران آئندہ دنوں میں دیکھے گا. اسرائیلی حکام کا دعویٰ ہے کہ ایران جوہری ہتھیار بنانے کے اس مرحلے تک پہنچ گیا ہے جہاں سے ”واپسی ناممکن“ ہے اس لیے اسرائیلی کارروائی ناگزیر تھی تاہم بہت سے مبصرین اس موقف پر سوال اٹھا رہے ہیں اور ایران کئی بار کہہ چکا ہے کہ اس کا جوہری پروگرام پرامن مقاصد کے لیے ہے مگر اسرائیل اس دعوے کو ہمیشہ سے مسترد کرتا رہا ہے نیتن یاہو کے ناقدین کا کہنا ہے کہ یہ ”وار آف چوائس“ ہے اور ایران کے جوہری پروگرام کے مسئلے کا حل صرف سفارتکاری سے ممکن ہے.