Live Updates

بھارت میں ہیلی کاپٹر حادثے میں بچے سمیت 7 افراد ہلاک

ہیلی کاپٹر ہندو یاتریوں کو ہمالیہ کے ایک مقدس مقام سے واپس لا رہا تھا موسم کی خرابی سے پہاڑوں میں گر کر تباہ ہو گیا. رپورٹ

میاں محمد ندیم اتوار 15 جون 2025 15:09

بھارت میں ہیلی کاپٹر حادثے میں بچے سمیت 7 افراد ہلاک

دہلی(اردوپوائنٹ اخبارتازہ ترین-انٹرنیشنل پریس ایجنسی۔15 جون ۔2025 )بھارت میں ہیلی کاپٹر حادثے میں 7 افراد ہلاک ہو گئے، جن میں ایک چھوٹا بچہ بھی شامل ہے حکام نے بتایا ہے کہ یہ ہیلی کاپٹر ہندو یاتریوں کو ایک مقدس مقام سے واپس لا رہا تھا جب وہ ہمالیہ کے پہاڑوں میں گر کر تباہ ہو گیا. رپورٹ کے مطابق یہ المناک واقعہ اس وقت پیش آیا جب اہل خانہ ابھی جمعرات کے روز احمد آباد کے رہائشی علاقے میں مسافر طیارہ گرنے سے ہلاک ہونے والے کم از کم 279 افراد کا سوگ منا رہے تھے ریاست اتراکھنڈ کے محکمہ ڈیزاسٹر رسپانس کے افسر نندن سنگھ راجوار نے بتایا کہ ہیلی کاپٹر کے پائلٹ اور تمام 6 مسافر ہلاک ہو گئے، یہ حادثہ اس وقت پیش آیا جب ہیلی کاپٹر کیدارناتھ مندر سے روانہ ہوا تھا.

(جاری ہے)

ریاست کے وزیر اعلیٰ پشکر سنگھ دھامی نے اس حادثے کو انتہائی افسوسناک خبر قرار دیتے ہوئے ریسکیو ٹیمیں روانہ کرنے کی تصدیق کی ضلع کے سیاحت کے افسر راہول چوبے کے مطابق موسم کی خرابی ممکنہ طور پر حادثے کی وجہ بنی کیدارناتھ مندر گرمیوں میں یاتریوں کے لیے قابل رسائی ہوتا ہے. یہ مندر سطح سمندر سے 3 ہزار 584 میٹر کی بلندی پر واقع ہے، سخت چڑھائی سے بچنے کے لیے مالدار یاتری ہیلی کاپٹرز کے ذریعے سفر کو ترجیح دیتے ہیں اور اس مقصد کے لیے چھوٹی سطح کی نجی کمپنیوں کی صنعت بھی قائم ہو چکی ہے یاد رہے کہ گزشتہ ماہ بھی ایک ہیلی کاپٹر حادثے میں 6 افراد ہلاک ہو چکے ہیں جو اسی زیارت گاہ کی طرف جا رہے تھے.