Live Updates

عمران خان کی رہائی کیلئے بہت کچھ کیا لیکن اللہ کی طرف سے ہر چیز کا وقت مقرر ہے، علی امین گنڈا پور

علی امین گنڈا پور نے بانی پی ٹی آئی کی رہائی کا معاملہ اللہ پر چھوڑ دیا، میں نے عمران خان کی رہائی کیلئے کوشش کرنے میں کوئی کسر نہیں چھوڑی میرا ضمیر مطمئن ہے، وزیراعلیٰ خیبرپختونخواہ کی میڈیا سے گفتگو

فیصل علوی جمعرات 10 اپریل 2025 11:50

عمران خان کی رہائی کیلئے بہت کچھ کیا لیکن اللہ کی طرف سے ہر چیز کا وقت ..

پشاور(اردوپوائنٹ اخبار تازہ ترین۔10اپریل 2025)وزیراعلیٰ خیبرپختونخواہ علی امین گنڈا پور نے کہا ہے کہ میں نے بانی پی ٹی آئی عمران خان کی رہائی کیلئے بہت کچھ کیا لیکن اللہ کی طرف سے ہر چیز کا وقت مقرر ہے، علی امین گنڈا پور نے بانی پی ٹی آئی کی رہائی کا معاملہ اللہ پر چھوڑ دیا،پشاور میں میڈیا سے گفتگو کرتے ہوئے وزیراعلیٰ خیبرپختونخواہ کا کہناہے کہ میں نے عمران خان کی رہائی کیلئے کوشش کرنے میں کوئی کسر نہیں چھوڑی۔

میرا ضمیر مطمئن ہے۔میں ہر بندے کو خوش نہیں کرسکتا کارکنوں کو جلد خوشخبری ملے گی۔انہوں نے کہا تمام کہ اختلافات پارٹی کے اندر حل کرنے چاہئیں۔اس وقت پارٹی میں بیان کوئی دیتا ہے اور اس کی تشریح کوئی اورکرتا ہے۔علی امین گنڈاپور نے پارٹی میں اپنے مخالفین کو مخاطب کرتے ہوئے کہا کہ جن کو دشمنی کا شوق ہے تو میرے خلاف اعلان جنگ کر دو۔

(جاری ہے)

خیال رہے کہ اس سے قبل گزشتہ روز وزیراعلیٰ خیبرپختونخواہ علی امین گنڈاپور نے کہا تھا کہ بانی پی ٹی آئی کی بہنوں کیساتھ ناروا سلوک کا وقت آنے پر حساب لیا جائے گا۔

عمران خان کی بہنوں کیساتھ ناروا سلوک ناقابل برداشت تھا۔میڈیا سے گفتگو کرتے ہوئے علی امین گنڈاپورنے یہ بھی کہا تھا کہ حکومت کی فسطائیت کا ڈٹ کر مقابلہ کرتے آرہے ہیں آگے بھی کرتے رہیں گے۔ بانی پی ٹی آئی نا حق قید تھے۔ ان کی رہائی تک ہماری جدو جہد جاری رہے گی۔علی امین گنڈاپور نے یہ بھی کہاتھا کہ ملاقات کی اجازت نہ دینااور تشدد کرناحکمرانوں کی بوکھلاہٹ کا منہ بولتا ثبوت تھا۔

حکومت ہوش کے ناخن لے اور ملک کو انارکی کی طرف لے جانے سے باز آئے۔بانی پی ٹی آئی کے اہل خانہ اورپارٹی قائدین کو ملاقات کی اجازت نہ دیناانسانی حقوق کی سنگین خلاف ورزی تھا۔ حکومت کوعدالتی احکامات کی کوئی پرواہ ہے نہ بنیادی انسانی حقوق کا کوئی لحاظ نہیں تھا۔انہوں نے مطالبہ کیاتھا کہ عدلیہ اپنے احکامات اور انسانی حقوق کی ان خلاف ورزیوں کا نوٹس لے۔حکومت بانی پی ٹی آئی کی دشمنی میں انسانی حقوق کی خلاف ورزیوں کی تمام حدیں پار کر رہی تھی۔اس طرح کےغیر انسانی اور غیر قانونی ہتھکنڈے ہمارے حوصلے پست نہیں کر سکتے۔