Live Updates

پی ایس ایل10،ملتان میں کھیلے جانے والے میچز کے حوالے سے سیکورٹی پلان جاری

جمعرات 10 اپریل 2025 16:58

ملتان (اُردو پوائنٹ اخبارتازہ ترین - اے پی پی۔ 10 اپریل2025ء) سٹی پولیس آفیسر صادق علی ڈوگر کی ہدایت پر ملتان پولیس کی جانب سے پاکستان سپر لیگ سیزن 10 کے ملتان کرکٹ سٹیڈیم میں کھیلے جانے والے میچز کے حوالے سے سیکورٹی پلان جاری کر دیا گیا۔ترجمان پولیس کی جانب سے جاری کردہ تفصیلات کے مطابق پی ایس ایل 10 کے ملتان میں کھیلے جانے والے میچز کے دوران فول پروف سیکورٹی کو یقینی بنانے کے لیے مجموعی طور پر 8 ہزار سے زائد پولیس افسران و اہلکار ڈیوٹی فرائض سرانجام دیں گے۔

پی ایس ایل 10 کا آغاز 11 اپریل سےراولپنڈی میں ہوگا ۔ ملتان کرکٹ سٹیڈیم میں پی ایس ایل 10 کے پانچ میچز کھیلے جائیں گے،جو بالترتیب 22،23 اپریل اور یکم،پانچ،10 مئی کو کھیلے جائیں گے۔سی پی او ملتان صادق علی ڈوگر ملتان میں کھیلے جانے والے میچز کے تمام تر سیکورٹی انتظامات کی نگرانی خود کریں گے۔

(جاری ہے)

ملتان پولیس کے ساتھ ساتھ ٹریفک پولیس، ایلیٹ فورس، پاک فوج، رینجرز، سپیشل برانچ اوردیگرقانون نافذ کرنے والے اداروں کے افسران و جوان ملتان کرکٹ سٹیڈیم، ملتان ایئرپورٹ، روٹس، پارکنگ پوائنٹس، ہوٹلز اور دیگر مختلف مقامات پر سیکورٹی ڈیوٹی سر انجام دیں گے۔

اسی حوالے سے تمام اہم مقامات اور گردونواح میں بڑے پیمانے پر سرچ آپریشن کیا جا رہا ہے۔مزید برآں جدید تربیت یافتہ اور جدید اسلحہ سے لیس کمانڈوز بشمول لیڈی کمانڈوز پر مشتمل ٹیم کسی بھی ہنگامی صورتحال سے نمٹنے کے لیے سٹیڈیم کے اطراف میں پیٹرولنگ کرے گی۔ملتان کرکٹ سٹیڈیم آنے والے کرکٹ شائقین کے لیے فاطمہ جناح ٹاؤن میں گاڑیوں کی پارکنگ کی جائے گی ۔

شائقین کو فاطمہ جناح ٹاؤن پارکنگ پوائنٹ سے سٹیڈیم تک خصوصی شٹل بس سروس کے ذریعے پہنچایا جائیگا۔کرکٹ شائقین کو اپنی شناخت ثابت کرنے کے لیے قومی شناختی کارڈ اپنے ہمراہ لازمی رکھنے کی ہدایت کی گئی ہے۔کوئی بھی آتشی اسلحہ، کھلونا بندوقیں، دھماکہ خیز مواد، پٹاخے، سگریٹ، ماچس، لائٹر، کوئی بھی تیز دھار مواد جیسے چاقو اور دھات یا لکڑی سٹیڈیم کے اندر لے جانے کی اجازت نہیں ہے۔ کسی بھی بینر و پوسٹر یا پلے کارڈ جس پر مذہب یا نسل کی بنیاد پر امتیازی سلوک یا فحش باتیں درج ہوں ان کی سختی سے ممانعت ہے۔کرکٹ شائقین کو گراؤنڈ، کھلاڑیوں اور ساتھی تماشائیوں پرکسی قسم کی چیز پھینکنے کی اجازت نہیں ہوگی۔سٹیڈیم کے احاطے میں ڈرون کیمروں کے استعمال پرسخت پابندی ہے۔