Live Updates

پی ایس ایل میچزکی سکیورٹی کے لئے راولپنڈی پولیس کے پانچ ہزارسے زائد افسران و اہلکار تعینات

جمعہ 11 اپریل 2025 19:18

راولپنڈی (اُردو پوائنٹ اخبارتازہ ترین - اے پی پی۔ 11 اپریل2025ء) پاکستان سپر لیگ میچز کی سکیورٹی کے لئے راولپنڈی پولیس نے پانچ ہزار سے زائد افسران و اہلکاروں کو تعینات کردیا ہے ۔پولیس ترجمان کے مطابق سکیورٹی انتظامات کے علاوہ ٹریفک کی روانی کو برقرار رکھنے کے لیے 367 ٹریفک پولیس افسران فرائض سرانجام دیں گے،سٹیڈیم کے گردونواح میں ایلیٹ فورس، ڈولفن فورس اور تھانوں کی موبائلز گشت کے فرائض سرانجام دیں گی۔

(جاری ہے)

سی پی او سید خالدہمدانی کا کہنا تھاکہ انتظامات کی سی سی ٹی وی مانیٹرنگ کے لیے خصوصی کنٹرول روم قائم کیا گیا ہے، ٹیموں کے روٹ کی موثر سکیورٹی کے ساتھ ساتھ چھتوں پر سنائپرز تعینات کیے گئے ہیں، تمام سینئر افسران فیلڈ میں موجود رہ کر ڈیوٹی پر مامور افسران کو چیک اور بریف کریں گے، شائقین کرکٹ کو واک تھرو گیٹ اور مکمل باڈی سرچنگ کے بعد سٹیڈیم میں داخلے کی اجازت دی جائے گی۔ پاک فوج، رینجرز، دیگر سکیورٹی اداروں اور ضلعی انتظامیہ کے ربط سے فول پروف سکیورٹی انتظامات کویقینی بنایا جائے گا۔ پاکستان سپر لیگ میچز کے دوران شہریوں کو پر سہولت اور خوشگوار ماحول کی فراہمی کے لیے ہر ممکن اقدامات کیے جارہے ہیں۔