چیئرپرسن وزیراعلی پنجاب انسپکشن بریگیڈیئر (ر)بابر علاؤالدین کا راولپنڈی رنگ روڈ منصوبے کادورہ

راولپنڈی (اُردو پوائنٹ اخبارتازہ ترین - اے پی پی۔ 12 اپریل2025ء) چیئرپرسن وزیراعلی پنجاب انسپکشن، سرویلنس و مانیٹرنگ ڈائریکٹوریٹ بریگیڈیئر (ر)بابر علاؤالدین ستارہ امتیاز ملٹری نے رنگ روڈ راولپنڈی کا دورہ کیا۔ سٹاف آفیسر عبدالجبار بھٹی، کرنل جنید فاروقی اور عبداللہ بابر بھی ان کے ہمراہ تھے۔ چیف انجینئر راولپنڈی ڈویلپمنٹ اتھارٹی محمد انور باران نے ان کا استقبال کیا۔

دورے کے دوران بریگیڈیئر(ر) بابر علاؤالدین کو خالصہ خورد میں ایف ڈبلیو او کے کیمپ آفس میں راولپنڈی رنگ روڈ منصوبے کی پیشرفت پر مفصل بریفنگ دی گئی۔ اس منصوبے کی موجودہ پیشرفت اور حاصل شدہ سنگ میلوں کی تفصیلات انہیں فراہم کیں گئیں۔ بریگیڈیئر (ر) بابر علاؤالدین نے جاری کوششوں کی ستائش کرتے ہوئے کہا کہ راولپنڈی رنگ روڈ کا منصوبہ سابق وزیر اعظم نواز شریف کی زیر قیادت شروع کیا گیا تھااور اب وزیر اعلیٰ مریم نواز شریف کی قیادت میں یہ منصوبہ مکمل ہونے جا رہا ہے، جو علاقے کے لیے اہم فوائد لے کر آئے گا۔

(جاری ہے)

انہوں نے کہا کہ رنگ روڈ منصوبہ راولپنڈی کے عوام کے لیے وزیر اعلیٰ مریم نواز شریف کا ایک تحفہ ہے۔ انہوں نے مزید کہا کہ وزیر اعلیٰ مریم نواز شریف اس منصوبے کی تیز تکمیل کے لیے پر عزم ہیں، جو راولپنڈی میں ٹریفک کی پیچیدگیوں کو کم کرے گا اور مقامی افراد کے لیے روزگار کے مواقع پیدا کرے گا۔ چیف انجینئر آر ڈی اے محمد انور باران نے چئیرپرسن کو منصوبے کی موجودہ صورتحال سے آگاہ کیا اور بتایا کہ 38.3 کلومیٹر راولپنڈی رنگ روڈ کا 49 فیصد کام مکمل ہو چکا ہے۔

بریگیڈیئر (ر) بابر علاؤالدین نے آرڈی اے کی کوششوں کو سراہا اور اب تک کی گئی پیشرفت کو قابل تعریف قرار دیا۔ اس کے علاوہ بریگیڈیئر (ر) بابر علاؤالدین نے راولپنڈی میں غیر قانونی ہاؤسنگ سکیموں اور غیر مجاز تعمیرات کے خلاف سخت کارروائی کی ہدایات دیں۔ انہوں نے کہا کہ شہری ترقیاتی منصوبوں میں قانونی معیارات کی پیروی کرنا ضروری ہے تاکہ شہر کی ترقی منظم ہو سکے۔

انہوں نے یہ بھی کہا کہ وزیر اعلیٰ مریم نواز شریف نے غیر قانونی عمارتوں کو مسمار کرنے کا حکم دیا ہے اور یہ واضح کر دیا ہے کہ غیر قانونی تعمیرات کو کسی صورت برداشت نہیں کیا جائے گا۔ انہوں نے یہ بھی ہدایت دی کہ قانونی طور پر مختص علاقوں میں ہاؤسنگ سکیموں کی درخواستوں کو مکمل دستاویزات کے ساتھ فوری طور پر نمٹایا جائے۔ چیف انجینئر آر ڈی اے نے تصدیق کی کہ یہ اقدامات راولپنڈی میں ترقیاتی منصوبوں کو قانونی معیارات کے مطابق بنانے کے لیے کیے جا رہے ہیں۔

آرڈی اے مقامی اداروں کے تعاون سے غیر قانونی تعمیرات کو سربمہرو مسمار کر رہا ہے۔ انہوں نے کہا کہ ڈویلپرز اور شہریوں کو تمام ضوابط کی پیروی کرنے کی ترغیب دی جاتی ہے تاکہ قانونی پیچیدگیوں سے بچا جا سکے۔ بریگیڈیئر ریٹائرڈ بابر علاؤالدین نے اس موقع پر پودا لگایا اور ملکی سلامتی کے لیے دعا کی۔ انہوں نے کہا کہ شجرکاری مہم میں شہری بڑھ چڑھ کر حصہ لیں تاکہ اس ملک کو سر سبز و شاداب بنایا جاسکے۔