ویرات کوہلی نے ٹی 20 کرکٹ میں ایک اورسنگ میل عبور کرلیا

راجستھان رائلز کے خلاف کوہلی نے اپنی 100ویں نصف سنچری مکمل کی

پیر 14 اپریل 2025 22:05

جے پور(اُردو پوائنٹ اخبارتازہ ترین - آن لائن۔ 14 اپریل2025ء) بھارتی کرکٹ اسٹار اور رائل چیلنجرز بنگلور (آر سی بی) کے سابق کپتان ویرات کوہلی نے ٹی ٹوئنٹی کرکٹ میں ایک اور سنگ میل عبور کرلیا۔اتوار کو آئی پی ایل 2025 کے میچ میں راجستھان رائلز کے خلاف مقابلے کے دوران کوہلی نے اپنی 100ویں نصف سنچری مکمل کی۔ اس کے ساتھ وہ ٹی ٹوئنٹی کرکٹ میں 100 ففٹیز بنانے والے دنیا کے دوسرے اور بھارت کے پہلے کھلاڑی بن گئے ہیں۔

ویرات کوہلی نے یہ کارنامہ اپنے 405ویں ٹی ٹوئنٹی میچ میں انجام دیا، ٹی ٹوئنٹی کرکٹ میں سب سے زیادہ ففٹیز آسٹریلوی اوپنر اور کراچی کنگز کے کپتان ڈیوڈ وارنر کے نام ہیں، جنہوں نے 400 میچز میں 108 ففٹیز اسکور کیں۔ کوہلی 405 میچز میں 100 ففٹیز کے ساتھ دوسرے نمبر پر ہیں۔

(جاری ہے)

آئی پی ایل میں بھی کوہلی کا ریکارڈ شاندار ہے۔ راجستھان کے خلاف ان کی حالیہ نصف سنچری آئی پی ایل میں ان کی 58ویں ففٹی تھی، جب کہ لیگ میں ان کے مجموعی 50 پلس اسکورز کی تعداد 66 ہوگئی ہے، جو ڈیوڈ وارنر کے برابر ہے۔

ڈیوڈ وارنر نے آئی پی ایل میں 62 ففٹیز اور 4 سنچریاں اسکور کیں، جبکہ کوہلی نے اب تک 58 ففٹیز اور 8 سنچریاں بنائی ہیں۔کوہلی موجودہ سیزن میں بھی شاندار فارم میں ہیں۔ انہوں نے کولکتہ نائٹ رائیڈرز کے خلاف ناقابل شکست 59 رنز سے آغاز کیا، چنئی کے خلاف 31، گجرات کے خلاف صرف 7 پر آوٹ ہوئے، مگر ممبئی انڈینز کے خلاف شاندار 67 رنز بنائے، جبکہ دہلی کے خلاف 22 رنز کا حصہ ڈالا۔