میلہ چراغاں کے خصوصی ایڈیشن کا انعقاد، حضرت شاہ حسین کے فکری ورثے پر مبنی بھرپور سیشنز منعقد ہوئے

پیر 14 اپریل 2025 23:20

لاہور (اُردو پوائنٹ اخبارتازہ ترین - اے پی پی۔ 14 اپریل2025ء) شالیمار باغ میں میلہ چراغاں 2025کا خصوصی ایڈیشن پیر کو منعقد ہوا جو مکمل طور پر خواتین کیلئے مختص تھا۔ اس موقع پر صوفی شاعری، پنجابی ادب اور حضرت شاہ حسین کے فکری ورثے پر مبنی بھرپور سیشنز منعقد ہوئے۔ڈاکٹر شبنم اسحاق، ڈاکٹر کلیان سنگھ کلیان، ڈاکٹر ظہیر حسن وٹو، اور ڈاکٹر فیصل جپہ جیسے ممتاز اسکالرز نے ''گھم چرخڑا گھم ''اور''بھگتی لہر''جیسے موضوعات کے ذریعے شاہ حسین کی شاعری کی گہرائی کو اجاگر کیا۔

ڈاکٹر شبنم اسحاق اور ڈاکٹر حنا خان کے مشترکہ سیشن ''چوڑی ہاں دربار دی''میں صوفی تخلیقی اظہار پر روشنی ڈالی گئی۔اس موقع پر ایک پنجابی مشاعرہ بھی ہوا جس میں رائے محمد خان ناصر اور بابا غلام حسین ندیم قادری نے شرکت کی۔

(جاری ہے)

اسسٹنٹ ڈائریکٹر جناب طلحہ شفیق نے خواتین کے لیے مخصوص دن کی اہمیت کو اجاگر کیا اور کہا کہ میلہ چراغاں نہ صرف ثقافتی بلکہ روحانی طور پر بھی لاہور کے ورثے کا جشن ہے، صوفی اور لوک موسیقی محفل کا مرکز رہی، لیاقت پارکوی اور مست قلندر ڈیرہ کے چاپ فنکاروں نے روایتی جوش برقرار رکھا جبکہ تاج مستانی اور شوکت فقیر نے اپنی روحانی پرفارمنسز سے ماحول کو وجدانی بنا دیا۔

دوسری چھت پر خواجہ غلام فرید اور مادھو لال حسین کے مزارات سے منسلک فنکاروں نے مسلسل فنکارانہ صلاحیتوں کا مظاہرہ کیا۔مہتابی چھت پر حسب روایت رقص درویش کی پرفارمنس نے روحانی مرکزیت کو جنم دیا جسے اس میلہ کی روح سمجھا جاتا ہے جبکہ شام ہوتے ہی دوسری چھت پر آتشبازی کے شاندار مظاہرے اور پنجابی اکھاڑے کی بھرپور توانائی نے مجمعے کو اپنی جانب کھینچ لیا جبکہ رات کا اختتام تیسری چھت پر معروف فنکارہ تحسین سکینہ کی دل موہ لینے والی پرفارمنس سے ہوا جنہوں نے حاضرین کو مسحور کر کے اس دن کو یادگار بنا دیا۔

خواتین کیلئے مخصوص دن منانے کی روایت میلہ چراغاں کی پرانی روایت ہے جسے آج دوبارہ زندہ کیا گیا، اس دوران کھانے اور دستکاری کے اسٹالز نے بھی اپنی رنگین خوشبوں اور ذائقوں کے ساتھ عوام کو مسلسل اپنی طرف متوجہ کئے رکھا۔