کینیڈین ایسوسی ایشن آف یونیورسٹی ٹیچرز کی اراکین کو امریکا کا غیرضروری سفر نہ کرنے کی ہدایت

اوٹاوا (اُردو پوائنٹ اخبارتازہ ترین - اے پی پی۔ 16 اپریل2025ء) کینیڈا کی یونیورسٹیوں میں تعلیمی عملے کی نمائندگی کرنے والی تنظیم کینیڈین ایسوسی ایشن آف یونیورسٹی ٹیچرز نے اپنے اراکین کو امریکا کا غیر ضروری سفر نہ کرنے کی ہدایت کی ہے۔ اردو نیوز کے مطابق تنظیم نے ٹرمپ انتظامیہ کی جانب سے پیدا کئے گئے سیاسی منظرنامے اور کچھ کینیڈین شہریوں کو سرحد عبور کرنے میں مشکلات کا سامنا کرنے کی اطلاعات کے تناظر میں ایڈوائزری جاری کرتے ہوئے کہا ہے کہ جن ماہرین تعلیم کا تعلق اُن ممالک سے ہے جن کے امریکا کے ساتھ کشیدہ سفارتی تعلقات ہیں یا جنہوں نے خود ٹرمپ انتظامیہ کے حوالے سے منفی خیالات کا اظہار کیا ہے، انہیں امریکی سفر کے حوالے سے خاص طور پر محتاط رہنا چاہیے۔

یہ انتباہ خاص طور پر اُن ماہرین تعلیم کے لیے ہے جو ٹرانسجینڈرز ہیں یا جن کی تحقیق کو موجودہ امریکی انتظامیہ کی پالیسی سے متصادم سمجھا جا سکتا ہے۔

(جاری ہے)

تنظیم نے کہا ہے کہ ماہرین تعلیم کو غور کرنا چاہیے کہ سرحد پار کرتے وقت ان کے پاس اپنے الیکٹرانک آلات پر کیا معلومات دستیاب ہیں، یا کن (معلومات) کی ضرورت ہے اور حساس معلومات کی حفاظت کے لیے اقدامات کریں۔

یونیورسٹی ٹیچرز ایسوسی ایشن کے ایگزیکٹو ڈائریکٹر ڈیوڈ رابنسن نے کہا کہ یہ 11 برسوں میں پہلی بار ہے کہ ان کے گروپ نے غیر ضروری امریکی سفر سے خبردار کیا ہے۔ انہوں نے کہا کہ یہ واضح ہے کہ امریکا میں داخل ہونے والے افراد کی سخت جانچ پڑتال کی گئی ہے اور ملک میں داخل ہونے والوں کی سیاسی سکریننگ کی جا رہی ہے۔ انہوں نے کہا کہ گروپ نے یہ فیصلہ حالیہ ہفتوں میں قانونی مشاورت کے بعد کیا۔

انہوں نے کہا کہ ایسوسی ایشن انتباہ کو اس وقت تک برقرار رکھے گی جب تک سیاسی سکریننگ کا خاتمہ نہیں ہو جاتا اور الیکٹرانک آلات پر خفیہ معلومات کا زیادہ احترام نہیں کیا جاتا۔ کینیڈا کی حکومت نے حال ہی میں امریکی سفر سے متعلق اپنی ایڈوائزری کو اپ ڈیٹ کرتے ہوئے شہریوں کو تنبیہہ کی ہے کہ انہیں سرحدی محافظوں کی جانب سے جانچ پڑتال کا سامنا کرنا پڑ سکتا ہے اور اگر داخلے سے انکار کیا گیا تو انہیں حراست میں لیے جانے کا امکان ہے۔ امریکا کی وفاقی ایجنسی یو ایس کسٹمز اینڈ بارڈر پروٹیکشن کے اعداد و شمار کے مطابق رواں سال مارچ میں گذشتہ سال کے اسی مہینے کے مقابلے میں کینیڈا سے امریکا جانے والے افراد میں تقریباً 32 فیصد یا 864,000 مسافروں کی کمی واقع ہوئی۔