دھوکے بازی اور مالیاتی فراڈ میں ملوث سعودی شہری کو 5 سال قید کی سزا

جعلی ڈیجیٹل مارکیٹ آپریٹ کرنے والا شہری فرادکے بعدکسٹمر کا نمبر بلاک کردیتا تھا،رپورٹ

بدھ 16 اپریل 2025 11:52

ریاض(اُردو پوائنٹ اخبارتازہ ترین - این این آئی۔ 16 اپریل2025ء)سعودی عرب کی عدالت نے 41 افراد سے مالی فراڈ اور دھوکہ دہی کرنے پر سعودی شہری کو 5 برس قید کی سزا کا حکم سنا دیا۔ عرب ٹی وی کے مطابق ادارہ پراسیکیوشن نے تحقیقات مکمل کرکے کیس عدالت کو ارسال کردیا تھا۔

(جاری ہے)

ادارہ پراسیکیوشن کی جانب سے جاری تفصیلات میں بتایا گیا تھا کہ سعودی شہری کی جانب سے مالیاتی فراڈ کا کیس سامنے آیا جس میں ڈیجیٹل مارکیٹنگ کے ذریعے انتہائی ارزاں اشیا فروخت کرنے کا لالچ دیا گیا۔

جعلی ڈیجیٹل مارکیٹ آپریٹ کرنے والا شہری اپنے شکار سے فرضی اشیا کی قیمت اپنے اکانٹ میں وصول کرنے کے بعد ان کا نمبر بلاک کردیتا تھا۔پراسیکیوشن کے پاس مذکورہ شخص کے حوالے سے 41 افراد کی شکایات درج ہوئیں جس پر تحقیقات کا دائرہ وسیع کرتے ہوئے ملزم کو حراست میں لیا گیا۔تحقیقات میں اس پر عائد کیے جانے والے تمام جرائم ثابت ہونے پر کیس کریمنل کورٹ کو ارسال کردیا گیا جہاں عدالت نے 5 برس قید کی سزا سنا دی۔