چین ڈیل کرنا چاہتا ہے، ہم ڈیل کرنے جارہے ہیں، ٹرمپ

ملکی تاریخ کے سب سے کامیاب 100 دن مکمل ہونے کا جشن منانے پر خوش ہوں،گفتگو

بدھ 30 اپریل 2025 15:17

چین ڈیل کرنا چاہتا ہے، ہم ڈیل کرنے جارہے ہیں، ٹرمپ

بیجنگ (اُردو پوائنٹ اخبارتازہ ترین - این این آئی۔ 30 اپریل2025ء)امریکی صدر ڈونلڈ ٹرمپ نے کہاہے کہ چین ڈیل کرنا چاہتا ہے، ہم ڈیل کرنے جارہے ہیں، یہ منصفانہ ڈیل ہوگی۔میڈیارپورٹس کے مطابق صدر ٹرمپ نے حکومت کی100 دن مکمل ہونے پر ریلی سے خطاب کرتے ہوئے کہا کہ ہماری حکومت کے کامیاب ابتدائی 100 دن عقل کا انقلاب ہے، ملکی تاریخ کے سب سے کامیاب 100 دن مکمل ہونے کا جشن منانے پر خوش ہوں۔

(جاری ہے)

انہوں نے کہا کہ غیرقانونی بچوں کے لیے خودکار شہریت ختم کرنے کے حکم نامے پر دستخط کیے ہیں۔صدر ٹرمپ کا کہنا تھا کہ جو بائیڈن نے ہمیں بتایا کہ امیگریشن کے بہائو کو ختم کرنا ناممکن ہے، قانون سازی کی بھی ضرورت ہے، پتہ چلا کہ صرف ایک نئے صدر کی ضرورت تھی۔انہوں نے کہا کہ ڈیموکریٹس ٹیکس بڑھانا چاہتے ہیں، جو ری پبلکن ہمارے ایجنڈے کی حمایت نہیں کرتے انہیں باہر نکال دیں، مضبوط فوج اور کم ٹیکس چاہتے ہیں۔ان کا کہنا تھا کہ ہم پاگل پن اور ٹرانس جینڈر نظریات کو اپنی حکومت سے باہر کررہے ہیں، ہم امریکا کو ایک بار پھر عظیم بنا رہے ہیں اور یہ تیزی سے ہو رہا ہے۔