اسرائیلی بحریہ کے سابقہ وموجودہ ایلیٹ کمانڈو کا وزیر اعظم کو خط، قیدیوں کی فوری واپسی کا مطالبہ

ہم یرغمالیوں کی فوری واپسی کا مطالبہ کرتے ہیں، خواہ اس کے لئے لڑائی کو فوری طور پر روکنا پڑے،خط کامطالبہ

بدھ 16 اپریل 2025 15:38

تل ابیب(اُردو پوائنٹ اخبارتازہ ترین - این این آئی۔ 16 اپریل2025ء)اسرائیلی فضائیہ کے بعد بحریہ کے ایلیٹ کمانڈو یونٹ شایتیت 13 کے 200 سے زیادہ سابق اور موجودہ ارکان نے بھی وزیر اعظم بنجمن نیتن یاہوکے نام دستخط شدہ خط میں تمام قیدیوں کی فوری واپسی کا مطالبہ کیا ہے، خواہ اس کے لیے فوجی کارروائیوں کو ہی روکنا پڑے۔ عرب ٹی وی کے مطابق اسرائیلی اخبار نے گزشتہ روز یہ خط جاری کیا ہے۔

کمانڈوز یونٹ کی طرف سے اسرائیلی وزیر اعظم بنجمن نیتن یاہو کو بھیجے گئے خط میں کہا گیا کہ ہم اسرائیلی بحریہ کے یونٹ شایتیت 13 کے موجودہ اور سابق جنگجو 9 اپریل کو اسرائیلی فضائیہ کے پائلٹس کی جانب سے جاری ہونے والے خط کی حمایت کرتے ہیں۔ہم یرغمالیوں کی فوری واپسی کا مطالبہ کرتے ہیں، خواہ اس کے لئے لڑائی کو فوری طور پر روکنا پڑے۔

(جاری ہے)

اس سے قبل اسرائیلی فضائیہ کے تقریبا 1000 موجودہ اور ریٹائرڈ ریزرو فوجی اہل کاروں نے ایک خط میں غزہ میں قید یرغمالیوں کی واپسی کا مطالبہ کیا تھا، خواہ اس کے لئے جنگ کو مکمل طور پر روک دیا جائے۔

خط میں خدمات کی انجام دہی سے عام انکار کی دعوت نہیں دی گئی بلکہ اس میں حکومت پر زور دیا گیا کہ وہ قیدیوں کی رہائی کو جنگ کے جاری رکھنے پر ترجیح دے۔دستخط کرنے والوں کا موقف تھا کہ یہ جنگ قومی سلامتی کی بجائے اب سیاسی اور ذاتی مفادات کے کام آ رہی ہے۔خط میں جو کہ متعدد اسرائیلی اخبارات میں بطور اعلان شائع کیا گیا، واضح کیا گیا کہ جنگ کا جاری رہنا اس کے اعلان کردہ کسی بھی مقصد کے کام نہیں آ رہا ہے، اس کے نتیجے میں قیدی، فوجی اہل کار اور بے قصور شہری مارے جائیں گے۔ خط میں مزید کہا گیا کہ جیسا کہ پہلے ثابت ہو چکا ہے، قیدیوں کو صرف معاہدے کے ذریعے ہی باحفاظت واپس لایا جا سکتا ہے ۔ خط میں تمام اسرائیلی شہریوں کو حرکت میں آنے کی دعوت دی گئی۔