آئندہ ہفتے غزہ میں جنگ بندی معاہدہ ہوسکتا ہے، ڈونلڈ ٹرمپ

ایران کا جوہری پروگرام مکمل ختم کردیا، لیکن ایران اسے دوبارہ شروع کرسکتا ہے،گفتگو

ہفتہ 5 جولائی 2025 11:46

آئندہ ہفتے غزہ میں جنگ بندی معاہدہ ہوسکتا ہے، ڈونلڈ ٹرمپ

واشنگٹن (اُردو پوائنٹ اخبارتازہ ترین - این این آئی۔ 05 جولائی2025ء)امریکی صدر ڈونلڈ ٹرمپ نے کہا ہے کہ آئندہ ہفتے غزہ میں جنگ بندی معاہدہ ہوسکتا ہے، غزہ سے متعلق بہت کچھ کرنا ہے۔غیر ملکی میڈیا کے مطابق امریکی صدر ڈونلڈ ٹرمپ نے کہا ہے کہ غزہ میں بہت سی امداد بھیج رہے ہیں۔انہوں نے ایران کے حوالے سے بات کرتے ہوئے کہا کہ ایران کا جوہری پروگرام مکمل ختم کردیا، لیکن ایران اسے دوبارہ شروع کرسکتا ہے۔

ٹرمپ نے مزید کہا ہے کہ اسرائیلی وزیرِاعظم سے ایران سے متعلق بات کروں گا۔امریکی صدر نے مزید کہا ہے کہ ایران کا جوہری پروگرام مکمل ختم کر دیا ہے تاہم ایران جوہری پروگرام کسی دوسرے مقام پر دوبارہ شروع کر سکتا ہے۔امریکی صدر نے بتایا ہے کہ ٹیرف معاملے پر 12 ممالک کے لیے خطوط پر دستخط کر دیے ہیں جو پیر کو ارسال کر دیے جائیں گے۔

(جاری ہے)

دوسری جانب فلسطینی مزاحمتی تنظیم حماس کی جانب سے بیان میں کہا گیا کہ غزہ میں جنگ بندی کے لیے فوری طور پر مذاکرات شروع کرنے کے لیے تیار ہیں۔

امریکی صدرٹرمپ نے حماس کے بیان کا خیر مقدم کیا ہے۔ڈونلڈ ٹرمپ نے بتایا کہ روسی صدر ولادیمیر پیوٹن سے پابندیوں سے متعلق بات کی تھی، روسی صدر پیوٹن پابندیوں سے پریشان ہے۔انہوں نے یہ بھی کہا کہ میں چین کا دورہ کر سکتا ہوں یا چینی صدر امریکا کا دورہ کر سکتے ہیں۔ امریکی صدر کا یہ بھی کہنا تھا کہ ٹک ٹاک ڈیل کے بہت قریب ہیں۔