نائب وزیراعظم سینیٹراسحاق ڈار کی دعوت پر شنگھائی تعاون تنظیم کے سیکرٹری جنرل 17اور 18 اپریل کو پاکستان کا دورہ کریں گے، دفتر خارجہ

بدھ 16 اپریل 2025 18:04

اسلام آباد (اُردو پوائنٹ اخبارتازہ ترین - اے پی پی۔ 16 اپریل2025ء) نائب وزیراعظم اور وزیر خارجہ سینیٹر محمد اسحاق ڈار کی دعوت پر شنگھائی تعاون تنظیم (ایس سی او) کے سیکرٹری جنرل نورلان یرمیک بائیف 17اور 18 اپریل کو پاکستان کا دورہ کریں گے، وہ بیجنگ میں ایس سی او سیکرٹریٹ کے حکام پر مشتمل وفد کی قیادت کریں گے۔ دفتر خاجہ کی جانب سے بدھ کو جاری بیان کے مطابق ایس سی او کے سیکرٹری جنرل پاکستان میں اپنے قیام کے دوران نائب وزیر اعظم ، وزیر تجارت اور سیکرٹری خارجہ سے ملاقاتیں کریں گے۔

وہ نیشنل ڈیزاسٹر مینجمنٹ اتھارٹی اور فیڈریشن آف پاکستان چیمبرز آف کامرس اینڈ انڈسٹری کا دورہ کریں گے۔ وہ انسٹی ٹیوٹ آف سٹریٹیجک سٹڈیز اسلام آباد (آئی ایس ایس آئی) میں بھی خطاب کریں گے اور کاروباری رہنمائوں، کاروباری شخصیات اور میڈیا پرسنز سے بھی بات کریں گے۔

(جاری ہے)

شنگھائی تعاون تنظیم ایک دس رکنی بین الحکومتی بین علاقائی تنظیم ہے۔

یہ دنیا کی سب سے بڑی علاقائی کثیر جہتی تنظیم ہے۔ شنگھائی تعاون تنظیم خطہ 3.4 ارب لوگوں کا مسکن ہے (دنیا کی آبادی کا 42 فیصد پر مشتمل) اور اس کا رقبہ 36 ملین مربع کلومیٹر (عالمی لینڈ ماس کا 25 فیصد) ہے اور اس کا مجموعی جی ڈی پی 24.67 ٹریلین ڈالر جو عالمی جی ڈی پی کا 25 فیصد ہے۔ بیان کے مطابق ایس سی او رکن ممالک کے ساتھ اپنے گہرے اور تاریخی تعلقات کو مزید مضبوط بنانے اور مختلف شعبوں میں باہمی فائدے کے لیے سماجی و اقتصادی تعاون کو فروغ دینے کے لیے پاکستان کو ایک اہم پلیٹ فارم فراہم کرتا ہے۔

شنگھائی تعاون تنظیم کے سیکرٹری جنرل کا دورہ پاکستان کو شنگھائی تعاون تنظیم کے سیکرٹریٹ کے ساتھ منسلک ہونے کا موقع فراہم کرے گا جبکہ مشترکہ علاقائی سلامتی اور اقتصادی اہداف کو آگے بڑھانے کے لیے ایس سی او کے طریقہ کار کو مزید موثر بنانے کے لیے اپنے نقطہ نظر اور ترجیحات کو اجاگر کرے گا۔