شفافیت اور گورننس کی بہتری کیلئے تھرڈ پارٹی ویلیڈیشن سرکاری شعبے کے ہر منصوبے کا بنیادی جزو ہے، شہباز شریف

اسلام آباد(اُردو پوائنٹ اخبارتازہ ترین - این این آئی۔ 16 اپریل2025ء)وزیرِ اعظم محمد شہباز شریف سے ایسوسی ایشن آف چارٹرڈ سرٹیفائیڈ اکاؤنٹنٹس (اے سی سی ای) کے سات رکنی وفد نے عالمی چیف ایگزیکٹیو ہیلن برانڈ کی سربراہی میں ملاقات کی جس میں مختلف امورپر زیر غور آئے ۔ جاری اعلامیہ کے مطابق وزیرِ اعظم محمد شہباز شریف سے ایسوسی ایشن آف چارٹرڈ سرٹیفائیڈ اکاؤنٹنٹس (ACCA) کے سات رکنی وفد کی اسلام آباد میں ملاقات ہوئی ۔

ملاقات میں نائب وزیرِ اعظم و وزیرِ خارجہ محمد اسحاق ڈار، وفاقی وزراء خالد مقبول صدیقی، احد خان چیمہ، مشیر وزیرِ اعظم سید توقیر شاہ، چیئرمین ایچ ای سی ڈاکٹر مختار احمد اور متعلقہ اعلی حکام نے شرکت کی۔وفد نے وزیرِ اعظم کو اے سی سی اے کی پاکستان میں تاریخ اور ملکی معیشت کہ ترقی کیلئے اسکے کردار پر روشنی ڈالی. وفد نے بتایا کہ اے سی سی اے کے پاکستان سے تعلق رکھنے والے 13 ہزار ارکان دنیا بھر میں مختلف شعبوں میں اپنی خدمات سے ملک و قوم کا نام روشن کر رہے ہیں جبکہ 40 ہزار طلباء و طالبات اس وقت ممبرشپ کے حصول کیلئے زیر تعلیم ہیں. وفد نے ہائیر ایجوکیشن کمیشن کی جانب سے اے سی سی اے ارکان کو ماسٹرز کی ڈگری کی ایکولینس دینے پر شکریہ ادا کیا. وفد نے پاکستان کے گرین اکانومی ٹرانسفارمیشن پلان میں بھرپور تعاون کی خواہش کا اظہار کیا۔

(جاری ہے)

وفد نے بتایا کہ ایسوسی ایشن دنیا کے پائیدار مستقبل، ماحولیاتی تبدیلی کے مضر اثرات سے بچاؤ، اکاؤنٹینسی و آڈٹ کے شعبے میں جدت، کارپوریٹ شعبے میں خدمات کی آوٹ سورسنگ و دیگر جدید اقدامات کیلئے پاکستان کی حکومت کے ساتھ مل کر کام کرنے کا خواہاں ہی. وفد نے وزیرِ اعظم کی قیادت میں پاکستان کی معیشت کی ترقی کے حوالے سے کامیابیوں پر حکومتی ٹیم کی تعریف کی. وفد نے حکومت کے محصولات میں اضافے، نظام میں شفافیت کیلئے اقدامات اور استعداد میں اضافے کیلئے تعاون میں گہری دلچسپی کا اظہار کیا۔

وزیرِ اعظم کی متعلقہ حکام کو ایسوسی ایشن کے ساتھ مذکرات سے مستقبل کا لائحہ عمل طے کرنے کی ہدایت کی۔وزیرِ اعظم نے کہاکہ پاکستان کی خوش قسمتی ہے کہ اللہ رب العزت نے اسے نوجوان اور باصلاحیت افرادی قوت سے نوازا ہے۔ شہبازشریف نے کہاکہ پاکستان کی افرادی قوت کو بین الاقوامی معیار کے ہنر اور تربیت سے لیس کرنے کیلئے حکومت ترجیحی بنیادوں پر اقدامات کر رہی ہے۔

انہوںنے کہاکہ شفافیت اور گورننس کی بہتری کیلئے تھرڈ پارٹی ویلیڈیشن سرکاری شعبے کے ہر منصوبے کا بنیادی جزو ہے۔ شہبازشریف نے کہاکہ حکومتی کارکردگی اور گورننس کی بہتری حکومت کے ترجیحی اہداف میں شامل ہے،فِچ کی جانب سے پاکستان کی سرمایہ کاری درجہ بندی میں بہتری خوش آئند ہے، مگر ہمیں ابھی مزید محنت کرنی ہے۔ شہبازشریف نے کہاکہ عالمی سطح پر پاکستانی افرادی قوت کی مسابقت میں بہتری کیلئے ایسوسی ایشن نئی پیشہ ورانہ مہارتوں کی تربیت میں اہم کردار ادا کر سکتی ہے،حکومت پاکستان ایسوسی ایشن کی جانب سے حکومتی اداروں کی استعداد بڑھانے کی حوصلہ افزائی کرے گی۔

وزیرِ اعظم نے متعلقہ حکام کو ایسوسی ایشن سے تعاون میں اضافے اور مستقبل کے لائحہ عمل کیلئے مذاکرت کی ہدایت کی