پی او ایس قوانین کی خلاف ورزی پر آر ٹی او 1 کی کلفٹن اور بولٹن مارکیٹ میں دو اہم کارروائیاں

پی او ایس قوانین کی خلاف ورزیاں ٹیکس اہداف کی حصولی میں رکاوٹیں پیدا کرتی ہیں،چیف کمشنر ڈاکٹر فہیم محمد

بدھ 16 اپریل 2025 20:40

کراچی (اُردو پوائنٹ اخبارتازہ ترین - این این آئی۔ 16 اپریل2025ء) آر ٹی او 1 نے پی او ایس قوانین کی خلاف ورزیوں پر اپنی کاروائیاں جاری رکھتے ہوئے آج بولٹن مارکیٹ اور کلفٹن میں دو اہم کاروائیاں کیں۔

(جاری ہے)

پہلی کاروائی کے دوران بولٹن مارکیٹ میں ایک پرفیوم آوٹ لیٹ کو پی او ایس سسٹم سے غیر منسلک شدہ رسیدیں جاری کرنے پر سیلز ٹیکس قوانین 1990 کے رول 150 زیڈ ای او کے تحت سیل کیا گیا جبکہ دوسری کاروائی میں کلفٹن میں ایک الیکٹرانک آوٹ لیٹ کو ایس آر او 164/2025 کے تحت دو روز سے زائد پی او ایس سسٹم سے غیر منسلکی پر سیل کیا گیا ہے۔

اس موقع پر چیف کمشنر ڈاکٹر فہیم محمد نے کہا کہ پی او ایس قوانین کی خلاف ورزیاں ٹیکس اہداف کی حصولی میں رکاوٹیں پیدا کرتی ہیں اور ان قوانین کی خلاف ورزیوں پر کاروائیاں جاری رہیں گی۔ انہوں نے تاجر برادری پر پی او ایس قوانین پر مکمل عملدرآمد کرنے پر بھی زور دیا۔