دبئی نے کاروباری دنیا میں ایک اور عالمی سنگِ میل عبور کرلیا

دبئی کا مربوط ایکو سسٹم اسٹارٹ اپس اور اسمال میڈیم انٹرپرائزز کو مضبوط بنیاد فراہم کر رہا ہے،رپورٹ

جمعرات 17 اپریل 2025 14:59

ابوظبی (اُردو پوائنٹ اخبارتازہ ترین - این این آئی۔ 17 اپریل2025ء)متحدہ عرب امارات نے ترقی کی نئی بلندیوں کو چھوتے ہوئے ایک اور عالمی اعزاز اپنے نام کر لیا ہے۔ گلوبل انٹرپینورشپ مونیٹر کی حالیہ رپورٹ کے مطابق، یو اے ای کو مسلسل چوتھے سال دنیا کا بہترین کاروباری ملک قرار دیا گیا ہے۔میڈیارپورٹس کے مطابق یہ اعزاز دنیا بھر کے ممالک میں کاروباری ماحول کے تجزیے پر مبنی ہے، جس میں انٹرپینورشپ مونیٹر کے 13 اہم انٹرپینوریل فریم ورک نکات کا جائزہ لیا گیا۔

ان میں سے 11 نکات پر متحدہ عرب امارات نے دیگر ترقی یافتہ ممالک کو بھی پیچھے چھوڑ دیا۔یو اے ای نے فنڈز تک رسائی، سازگار حکومتی پالیسیوں، اور جدید کاروباری مواقع جیسے شعبوں میں نمایاں کامیابی حاصل کی ہے۔دبئی، جو ملک کا مرکزی بزنس حب ہے، اس عالمی کامیابی میں ایک مضبوط ستون کے طور پر ابھرا ہے۔

(جاری ہے)

دبئی کا تیزی سے ترقی کرتا ہوا ٹیک اسٹارٹ اپ ایکو سسٹم دنیا بھر کی توجہ کا مرکز بن چکا ہے، جسے ماہرین ایک معجزہ قرار دیتے ہیں۔

ایک معروف ماہر کے مطابق، جس طرح یو اے ای نے دبئی کو سب کے لیے کاروباری مواقع فراہم کرنے والا مرکز بنایا ہے اور جدت کی حوصلہ افزائی کی ہے، وہ قابلِ ستائش ہے۔دبئی کا مربوط ایکو سسٹم اسٹارٹ اپس اور اسمال میڈیم انٹرپرائزز کو مضبوط بنیاد فراہم کر رہا ہے۔ ان کمپنیوں کو انکیوبیٹرز، حکومتی فنڈز، اور اسٹریٹیجک رہنمائی فراہم کی جا رہی ہے، جو انہیں عالمی سطح پر مقابلے کے قابل بناتی ہے۔

یو اے ای کی وزیر برائے انٹرپینورشپ عالیہ بنت عبداللہ المزروعی اس تمام پیشرفت میں ایک نمایاں کردار ادا کر رہی ہیں۔ ان کا کہنا ہے کہ ہم نے ایک وسیع، مستقبل پر نگاہ رکھنے والا انٹرپینوریل ایکو سسٹم قائم کیا ہے۔ایک قریبی ساتھی کے مطابق، میں عالیہ المزروعی سے ملا ہوں، ان کے ساتھ سفر کیا ہے۔ وہ ایک غیرمعمولی طور پر جدت پسند اور ویژنری شخصیت ہیں جو مسلسل ترقی کے لیے کوشاں ہیں۔دبئی اکنامک ایجنڈا 2033 اور دبئی فیوچر فنڈ جیسے اسٹریٹیجک منصوبے نہ صرف کاروباری وسعت کا ذریعہ بن رہے ہیں بلکہ نئی کمپنیوں اور انٹرپرنیورز کو مکمل سپورٹ فراہم کر رہے ہیں۔