Live Updates

بابر اعظم نے بیٹنگ پوزیشن کی وجہ سے کراچی کنگز چھوڑی؟، راشد لطیف نے راز سے پردہ اُٹھادیا

بابر نے ایک صاحب کی وجہ سے کراچی سے دوری اختیار کی تھی اور لکھ کر فرنچائز کو آگاہ کیا تھا : سابق کپتان

ذیشان مہتاب ہفتہ 19 اپریل 2025 10:35

بابر اعظم نے بیٹنگ پوزیشن کی وجہ سے کراچی کنگز چھوڑی؟، راشد لطیف نے ..

لاہور (اردو پوائنٹ تازہ ترین اخبار ۔ 19 اپریل 2025ء ) قومی ٹیم کے سابق کپتان راشد لطیف نے بابر اعظم کے کراچی کنگز چھوڑنے کی وجہ سے پردہ اٹھا دیا۔

54 سالہ سابق کپتان و وکٹ کیپر بیٹر راشد لطیف نے مقامی یوٹیوب چینل کو انٹرویو دیتے ہوئے انکشاف کیا کہ فرنچائز نے 2022ء کے ٹی20 ورلڈکپ کے بعد ہی بابر اعظم کو ریلیز کرنے کا فیصلہ کرلیا تھا۔

انہوں نے کہا کہ سال 2022ء کے ٹی20 ورلڈکپ میں جب گرین شرٹس نے بابر اعظم کی قیادت میں سیمی فائنل میں جگہ بنائی تو فرنچائز نے دوبارہ رابطہ کیا۔

راشد لطیف نے کہا کہ کراچی کنگز کی فرنچائز میں ایک صاحب کی وجہ سے بابر نے دوری اختیار کرنے کا فیصلہ کیا اور لکھ کر آگاہ کیا تھا کہ وہ مزید فرنچائز کا حصہ نہیں بنے گا۔

سابق کپتان نے مزید کہا کہ کراچی کنگز نے پی ایس ایل میں اسی سال وائلڈ کارڈ کا استعمال صائم ایوب کیلئے بھی نہیں کیا تھا حالانکہ وہ اُسے منتخب کرسکتے تھے جب کہ ڈومیسٹک کا وہ بہترین پرفارمر تھا اور کوئٹہ نے اُسے ریلیز کیا۔

(جاری ہے)

قبل ازیں گزشتہ دنوں کراچی کنگز کے اونر سلمان اقبال نے اپنے بیان میں کہا تھا کہ فرنچائز بابر اعظم کو نمبر 3 کھلانا چاہتی تھی، جس پر اختلاف ہوا، بابراعظم اگر اس پوزیشن پر کھیلنے کو تیار ہوجاتے تو وہ آج بھی کراچی کنگز کے سکواڈ کا حصہ ہوتے۔

یاد رہے کہ بابر اعظم ملک اور فرنچائز دونوں کیلئے ٹی20 کرکٹ میں بطور اوپنر ہی کھیلنے میں دلچسپی رکھتے ہیں، پی ایس ایل میں انہوں نے 76 اننگز میں اوپننگ کی، اس دوران 47.01 کی اوسط اور 129.13 کے اسٹرائیک ریٹ سے 3103 رنز بنائے۔

پی ایس ایل 2023ء سے قبل ٹیم نے اپنے مارکی پلیئر بابر اعظم کی ٹریڈ کی تھی، وہ پشاور زلمی میں بطور کپتان چلے گئے تھے۔

دوسری جانب پاکستان سپر لیگ (پی ایس ایل) کے 10ویں ایڈیشن میں بابراعظم نے اپنے ابتدائی دو میچز میں محض صفر اور رن بنایا جبکہ ان کی ٹیم کو دونوں میچز میں شکست کا منہ دیکھنا پڑا ہے۔