شہنشاہ جذبات، عہد ساز اداکار محمد علی کی سالگرہ ہفتہ کو منائی گئی

ہفتہ 19 اپریل 2025 16:27

اسلام آباد (اُردو پوائنٹ اخبارتازہ ترین - اے پی پی۔ 19 اپریل2025ء) شہنشاہ جذبات، عہد ساز اداکار محمد علی کی سالگرہ ہفتہ 19 اپریل کو منائی گئی۔پاکستانی فلم انڈسٹری کی تاریخ میں شہنشاہ جذبات محمد علی کا نام نمایاں ہے۔ مکالموں کی ادائیگی کے منفرد انداز اور جاندار اداکاری سے کرداروں میں روح پھونکنے والے عظیم اداکار محمد علی 1931 میں رام پور بھارت میں پیدا ہوئےاورتقسیم ہند کے بعد پاکستان آگئے۔

انہوں نے اپنے فنی کیرئیر کی ابتدا ریڈیو سے بطور صداکار کی۔ مقناطیسی آواز کے مالک نے شوبز کی دنیا میں بھی اپنی الگ پہچان بنائی۔اداکار محمد علی نے منفرد انداز سے اداکاری میں انمٹ نقوش چھوڑے ہیں ۔ وہ جاندار اداکاری سے کردار میں روح پھونکنے کا فن جانتے ۔ انہوں نے اپنے فلمی سفر کا آغاز فلم چراغ جلتا رہا سے کیا اور پھر شوبز دنیا کے ہو کر رہ گئے۔

(جاری ہے)

فن کی دنیا میں انمٹ نقوش چھوڑنے والے محمد علی کردار میں اس قدر ڈوب جاتے کہ حقیقت کا گماں ہوتا۔ انہیں اپنی آواز کے اتار چڑھاو پر کمال کا عبور حاصل تھا۔انہوں نے اداکارہ شبنم، بابرہ شریف اور دیبا سمیت ماضی کی تمام معروف اداکاراؤں کے ساتھ بطور ہیرو کام کیا لیکن زیبا کے ساتھ ان کی جوڑی بے حد مقبول ہوئی اور پھر حقیقی زندگی میں بھی دونوں شادی کی ڈوری میں بندھ گئے۔

محمد علی نے آگ کا دریا، انسان اور آدمی، شمع، آئینہ اور صورت، کنیز اور صاعقہ سمیت درجنوں فلموں میں فن کا لوہا منوایا۔ورسٹائل اداکار محمد علی کو تمغہ امتیاز اور تمغہ حسنِ کارکردگی سے نوازا گیا۔ محمد علی تو 19 مارچ 2006 کو دنیا سے رخصت ہو گئے لیکن ان کا جداگانہ اور خوب صورت انداز اداکاری آج بھی مداحوں کے دلوں میں زندہ ہے۔شہنشاہ جذبات، عہد ساز اداکار محمد علی کی سالگرہ کے موقع پر شوبز انڈسٹری اور ان کے مداحوں کی جانب سے ان کی خدمات کے اعتراف میں انہیں بھر پور انداز میں خراج تحسین پیش کیا گیا۔