کامسٹیک ایس ٹی آئی ایجنڈا پر او آئی سی اسٹیئرنگ کمیٹی کے 22 سے 24 اپریل تک منعقد ہونے والے او آئی سی اسٹیئرنگ کمیٹی کے چھٹے اجلاس کی میزبانی کرے گا

اسلام آباد (اُردو پوائنٹ اخبارتازہ ترین - اے پی پی۔ 20 اپریل2025ء) کامسٹیک، اسلامی تعاون تنظیم برائے سائنسی و تکنیکی تعاون کی وزارتی قائمہ کمیٹی، او آئی سی سائنس، ٹیکنالوجی اور جدت طرازی (ایس ٹی آئی) ایجنڈا 2026 کے نفاذ کے لیے22 سے24 اپریل تک منعقد ہونے والے او آئی سی اسٹیئرنگ کمیٹی کے چھٹے اجلاس کی میزبانی کرے گا۔ تصدیق شدہ شرکا میں سعودی عرب، قازقستان، ترکی، اردن، یوگنڈا، بنگلہ دیش، ملائیشیا اور پاکستان سے او آئی سی کے 17 اداروں کے سربراہان اور نمائندے شامل ہیں جنہوں نے او آئی سی کے رکن ممالک میں ایس ٹی آئی تعاون کو مضبوط بنانے کے عزم کا اعادہ کیا۔

اس تقریب کی تیاری کے سلسلے میں او آئی سی کامسٹیک کے کوآرڈینیٹر جنرل پروفیسر ڈاکٹر محمد اقبال چودھری نے کامسٹیک ہیڈ کوارٹرز میں ایک اعلی سطحی تیاری اجلاس کی صدارت کی، جہاں انہوں نے اسٹیئرنگ کمیٹی کے اجلاسوں کی ہموار انجام دہی کو یقینی بنانے کے لئے اہم ہدایات جاری کیں۔

(جاری ہے)

اجلاس میں کامسٹیک کے سینئر افسران، پروگرام منیجرز اور محکمانہ نمائندگان نے شرکت کی۔

اسٹیئرنگ کمیٹی کے آئندہ اجلاس میں او آئی سی ایس ٹی آئی ایجنڈا 2026 پر عملدرآمد کی پیش رفت کا جائزہ لینے پر توجہ مرکوز کی جائے گی ، جس کا آغاز آستانہ ، قازقستان ، 2017 میں ایس ٹی آئی پر پہلے او آئی سی سربراہ اجلاس کے بعد کیا گیا تھا۔ ایجنڈے کا مقصد پائیدار ترقی کی حمایت کے لئے او آئی سی کے رکن ممالک کے درمیان تحقیقی تعاون، معلومات کے تبادلے اور ٹیکنالوجی کی منتقلی کو فروغ دینا ہے۔

کلیدی ایجنڈا آئٹمز میں ایس ٹی آئی ایجنڈا 2026 کے اہداف پر رکن ممالک کی پیش رفت کا جائزہ لینا، نئے مشترکہ اقدامات اور شراکت داریوں کی نشاندہی کرنا، مجوزہ او آئی سی ایس ٹی آئی ایجنڈے کی طرف لے جانے والے مستقبل کے اقدامات پر تبادلہ خیال کرنا اور ابوظہبی اعلامیہ (2022) کے تحت ان کی پیشرفت، چیلنجز اور سفارشات پر او آئی سی اداروں کی پریزنٹیشنز شامل ہیں۔

اجلاس میں او آئی سی جنرل سیکرٹریٹ، اسلامی ترقیاتی بینک گروپ(آئی ایس ڈی بی)، یو این اے، آئیسکو، آئی او ایف ایس، سیسرک، ایس ایم آئی آئی سی اور دیگر ادارے شرکت کریں گے۔ کامسٹیک ایس ٹی آئی تعاون کو آسان بنانے میں مرکزی کردار ادا کرتا رہے گا اور تجویز کردہ اقدامات پر عمل درآمد اور او آئی سی۔ایس ٹی آئی ایجنڈے کے اسٹریٹجک مقاصد کی جانب رفتار کو برقرار رکھنے کے لئے شراکت دار اداروں کے مابین ہم آہنگی کی نگرانی کرے گا۔