اسلام آباد ہائیکورٹ کے ججز کیخلاف بدنیتی پر مبنی کمپینزپر ایف آئی اے نے کہا کہ کچھ پتہ نہیں کون کر رہا ہے

لیکن جج ہمایوں دلاور کے خلاف مبینہ سوشل میڈیا مہم پر ایف آئی اے کو سب پتہ چل گیا حالانکہ جج نے خود شکایت بھی نہیں جمع کرائی، جسٹس بابر ستار کے اہم ریمارکس

محمد علی پیر 21 اپریل 2025 21:23

اسلام آباد ہائیکورٹ کے ججز کیخلاف بدنیتی پر مبنی کمپینزپر ایف آئی ..

اسلام آباد (اُردو پوائنٹ اخبارتازہ ترین۔ 21 اپریل2025ء) جج کیخلاف مبینہ سوشل میڈیا مہم کے کیس میں پیر کے روز اسلام آباد ہائیکورٹ کے جسٹس بابر ستار نے ایف آئی اے کے اقدامات پر سوال اٹھاتے ہوئے کہا کہ اسلام آباد ہائیکورٹ کے ججز کیخلاف بدنیتی پر مبنی کمپینزپر ایف آئی اے نے کہا کہ کچھ پتہ نہیں کون کر رہا ہے، لیکن جج ہمایوں دلاور کے خلاف مبینہ سوشل میڈیا مہم پر ایف آئی اے کو سب پتہ چل گیا حالانکہ جج نے خود شکایت بھی نہیں جمع کرائی۔

پیر کے روز اسلام آباد ہائیکورٹ میں دوران سماعت ایف آئی اے کے وکیل نے کہا کہ ڈی جی ایف آئی اے کی جانب سے رپورٹ جمع کروا دی گئی ہے، ڈی جی ایف آئی اے کی رپورٹ ہمارے موقف کی تائید ہے۔ ایف آئی اے رپورٹ کے مطابق جج ہمایوں دلاور کے خلاف سوشل میڈیا پر مہم شروع کی گئی، جسٹس بابر ستار نے استفسار کیا کہ کیا ایف آئی اے کو معلوم نہیں کہ عدالت میں رپورٹ کس طرح فائل کی جاتی ہے؟ شریک ملزم کے مطابق سوشل میڈیا مہم کے لیے سیاسی دباؤ تھا اس کا کیسے دفاع کریں گے؟ درخواست گزار کے مطابق شریک ملزم کا مجسٹریٹ کے سامنے دیا گیا بیان ریکارڈ پر موجود ہے، اس نے اس میں ایسا کچھ نہیں کہا۔

(جاری ہے)

جسٹس بابر ستار کے استفسار پر ایف آئی اے وکیل نے بتایا کہ جج کی طرف سے ایف آئی اے میں کوئی شکایت فائل نہیں کی گئی، ان کے بھانجے نے شکایت فائل کی تھی۔ جسٹس بابر ستار کا کہنا تھا کہ کوئی جج کی طرف سے کیسے شکایت درج کروا سکتا ہے؟ ایف آئی اے رپورٹ میں مہم سے عدلیہ کا وقار ختم کرنے کا لکھا ہوا ہے، آپ کو پتہ ہے اس ہائیکورٹ کے کتنے ججز کے خلاف بدنیتی پر مبنی کمپینز چلیں، لیکن اسلام آباد ہائیکورٹ کے ججز کے معاملے پر ایف آئی اے نے کہا کہ کچھ پتہ نہیں کون کر رہا ہے۔

تاہم اِس کیس میں ایف آئی اے کو سب پتہ چل گیا حالانکہ جج نے خود شکایت بھی نہیں جمع کرائی۔ اسلام آباد ہائیکورٹ کے جسٹس بابر ستار نے جج ہمایوں دلاور کے خلاف مبینہ سوشل میڈیا مہم پر ڈائریکٹر اینٹی کرپشن خیبرپختونخوا صدیق انجم و دیگر کے خلاف کیس میں ایف آئی اے رپورٹ کو غیرتسلی بخش قرار دیتے ہوئے دوبارہ رپورٹ جمع کرانے کا حکم دے دیا، جبکہ عدالت نے خصوصی عدالت میں مقدمے کا ٹرائل روکنے کا حکمِ امتناع برقرار رکھا۔