14 سالہ ویبھو سوریاونشی پاکستان میں ہوتا تو لوگ کہتے اسے ٹیم سے باہر اٹھاکر پھینکو: باسط علی

جس طرح اس نے پہلی بال پر چھکا مارا یہ بہت بڑی بات ہے : انٹرویو

ذیشان مہتاب منگل 22 اپریل 2025 12:19

14 سالہ ویبھو سوریاونشی پاکستان میں ہوتا تو لوگ کہتے اسے ٹیم سے باہر ..

کراچی (اردو پوائنٹ تازہ ترین اخبار ۔ 22 اپریل 2025ء ) پاکستان کے سابق ٹیسٹ کرکٹر باسط علی نے بھارتی بیٹر کے بارے میں کہا ہے کہ اگر یہ نوجوان بیٹر پاکستان میں ہوتا تو لوگ کہتے اسے ٹیم سے باہر اٹھاکر پھینکو۔

ویبھو سوریاونشی صرف 14 سال کے ہیں اور راجھستان رائلز نے انھیں آئی پی ایل 2025ء کیلیے پک کیا، نوعمر بیٹر نے بھی اپنی ٹیم کو مایوس نہیں کیا، انھوں نے اپنے ڈیبیو میں لکھنئو سپرجائنٹس کے خلاف 20 بالز پر 34 رنز کی جارحانہ اننگز کھیلی۔

دلچسپ بات یہ ہے کہ ویبھو سوریاونشی نے اپنے آئی پی ایل کیریئر کا آغاز چھکا مار کر کیا، انھوں نے اپنی پہلی ہی بال پر ہی شردل ٹھاکر کو چھکا رسید کرکے ناقدین کو حیران کردیا۔

55 سالہ سابق پاکستانی ٹیسٹ کرکٹر باسط علی نے اپنے یوٹیوب چینل پر ویبھو سوریاونشی کی تعریف کرتے ہوئے کہا کہ جس طرح اس نے پہلی بال پر چھکا مارا یہ بہت بڑی بات ہے۔

(جاری ہے)

باسط علی نے کہا کہ تصور کریں کہ اگر وہ پہلی بال پر چھکا مارنے کی کوشش کرتے ہوئے آئوٹ ہوجاتا تو لوگ کیا کہتے، پاکستان میں لوگ کہتے کہ اس بیٹر کو ٹیم سے باہر کرو، لیکن ایک پلیئر کو اسی طرح اعتماد دیا جاتا ہے جو بعد میں فائدہ مند ثابت ہوتا ہے۔

انھوں نے کہا کہ ابھشیک شرما، تلک ورما، جیسوال اور شبمن گل کو دیکھیں، وہ بڑے پلیئر اس لیے بنے کہ انھیں اعتماد دیا گیا۔