مرحومین کی روح کے ایصال ثواب کیلئے یکم مئی کو پروگرام ہو گا ،ڈاکٹرفردوس عاشق اعوان

منگل 22 اپریل 2025 16:52

سیالکوٹ (اُردو پوائنٹ اخبارتازہ ترین - اے پی پی۔ 22 اپریل2025ء) سابق وفاقی وزیر اطلاعات و نشریات ڈاکٹر فردوس عاشق اعوان نے کہا ہے کہ یکم مئی کو ان کے مرحوم بھائی ملک سجاد حیدر اعوان، والد گرامی حاجی عاشق حسین اعوان، دیگر مرحومین کی روح کے ایصال ثواب کے لیے ایک عظیم الشان روحانی پروگرام منعقد کیا جا رہا ہے۔ اس مقصد کے لیے انتظامی کمیٹی کا خصوصی اجلاس منعقد ہوا جس میں پروگرام کے انتظامات کے انعقاد کے لیے تفصیلی جائزہ لیا گیا۔

اس موقع پر ڈاکٹر فردوس عاشق اعوان نے کہا کہ یہ پروگرام نہ صرف مرحومین کے لیے ایصالِ ثواب کا ذریعہ ہو گا بلکہ ایک روحانی اجتماع کی حیثیت سے لوگوں کے دلوں کو بھی منور کرے گا، اس بابرکت محفل میں حفاظ کرام، علماء عظام، قراء حضرات، نعت خوان شیریں بیان اور زندگی کے مختلف شعبہ جات سے تعلق رکھنے والے افراد بڑی تعداد میں شرکت کریں گے، تاہم شرکاء کی سہولت کے لئے انتظامات میں کوئ فروگزاشت نہ کی جائے ۔

(جاری ہے)

انہوں نے مزید کہا کہ ایصال ثواب کی اسلامی تعلیمات میں بڑی اہمیت ہے۔ یہ عمل نہ صرف مرحومین کے درجات کی بلندی کا باعث بنتا ہے بلکہ زندہ افراد کے دلوں میں بھی اللہ تعالیٰ اور رسول اللہ صلی اللہ علیہ وسلم ، اہل بیت اطہار کی محبت، عقیدت اور نیکی کے جذبات کو فروغ دیتا ہے۔ اس موقع پر انہوں نے بتایا کہ اس موقع پر اجتماعی دعا، تلاوتِ قرآن، ذکر و نعت اور صدقات کے ذریعے ہم اپنے مرحومین کو وہ روحانی تحفہ دیتے ہیں جو ان کے لیے قبر میں راحت اور بخشش کا سامان بنتا ہے۔

اس موقع پر سابق وفاقی وزیر ڈاکٹر فردوس عاشق اعوان نے پروگرام شایانِ شان بنانے کے لیے تمام متعلقہ شعبہ جات کے منتظمین کوہدایات جاری کر دی ہیں کہ شرکت کرنے والے مندوبین کی سہولت کے لئے ہر ممکن اقدامات یقینی بنائے جائیں ،