وزیراعظم شہباز سے چینی کمپنی گلیکسی سپیس کے وفد کی ملاقات، دوطرفہ تعلقا ت پر گفتگو

سپیس ٹیکنالوجی،سپیس سٹیلائیٹ و ٹیلی کمیونیکیشن اور سٹیلائیٹ انٹر نیٹ کے شعبوں میں تعاون بڑھانے کی خواہش کااظہار

منگل 22 اپریل 2025 19:55

اسلام آباد (اُردو پوائنٹ اخبارتازہ ترین - این این آئی۔ 22 اپریل2025ء)وزیراعظم محمد شہباز شریف نے سپیس ٹیکنالوجی،سپیس سٹیلائیٹ و ٹیلی کمیونیکیشن اور سٹیلائیٹ انٹر نیٹ کے شعبوں میں تعاون بڑھانے کی خواہش کااظہار کرتیہوئے کہا ہے کہ پاکستان سپیس ٹیکنالوجی کے شعبے کو انتہائی اہمیت دیرہا ہے۔ وزیراعظم آفس کے میڈیا ونگ سے جاری بیان کے مطابق ان خیالات کا اظہار انہوں نے چین سے تعلق رکھنے والی سپیس ٹیکنالوجی کمپنی "گلیکسی سپیس"کے وفد سے گفتگو کرتے ہوئے کیا جس نے چیئرمین زو منگ کی قیادت میں منگل کو یہاں ان سے ملاقات کی۔

ملاقات میں وفاقی وزیر اقتصادی امور احد خان چیمہ، وفاقی وزیر انفارمیشن ٹیکنالوجی و ٹیلی کام شزا فاطمہ، وزیر کے مشیر ڈاکٹر توقیر شاہ اور متعلقہ سرکاری اداروں کے افسران نے شرکت کی۔

(جاری ہے)

اس موقع پر وزیراعظم نے کہا کہ پاکستان سپیس ٹیکنالوجی شعبے کو انتہائی اہمیت دے رہا ہے۔ چین ہمارا انتہائی قابل اعتماد دوست اورسٹریٹجک شراکت دار ہے۔ وزیراعظم نے کہا کہ چین کے ساتھ سپیس ٹیکنالوجی،سپیس سٹیلائیٹ اور ٹیلی کمیونیکیشن، سٹیلائیٹ انٹر نیٹ کے شعبوں میں تعاون بڑھانے کے خواہاں ہیں۔

گلیکسی سپیس کے وفد نے پاکستان کی سپیس ٹیکنالوجی انڈسٹری میں سرمایہ کاری اور پاکستانی سپیس ٹیکنالوجی کے اداروں اور نجی ٹیلی کام کمپنیوں کے ساتھ مشترکہ منصوبوں کے حوالے سے گہری دلچسپی کا اظہار کرتیہوئے کہاکہ وزارت انفارمیشن ٹیکنالوجی و ٹیلی کام اور سپارکو کے حکام سے ملاقاتیں انتہائی مفید رہیں۔ وفد نے پاکستان میں پرتپاک میزبانی پر حکومت پاکستان کا شکریہ اداکیا۔