بلال کالونی پارک کے قریب سے خاتون کی لاش ملنے کے واقعے میں اہم پیش رفت

سی سی ٹی وی فوٹیج سامنے آگئی ، جس میں خاتون کو موٹر سائیکل پر سوار دیکھا جا سکتاہے، ورثا نے خاتون سے لاتعلقی کا اظہار کر دیا،پولیس حکام

بدھ 23 اپریل 2025 13:30

کراچی(اُردو پوائنٹ اخبارتازہ ترین - این این آئی۔ 23 اپریل2025ء)شہر قائد کے علاقے کورنگی میں بلال کالونی پارک کے قریب سے خاتون کی لاش ملنے کے واقعے کے سلسلے میں ایک سی سی ٹی وی فوٹیج سامنے آئی ہے، جس میں خاتون کو موٹر سائیکل پر سوار دیکھا جا سکتا ہے۔ایک سرویلنس فوٹیج منظرعام پر آئی ہے، جس میں دیکھا جا سکتا ہے کہ خاتون کو کورنگی کے پارک میں کیسے لایا گیا تھا، فوٹیج میں خاتون کو موٹر سائیکل پر بیٹھے ہوئے دیکھا جا سکتا ہے، اور موٹر سائیکل سوار کے ساتھ ایک بچہ بھی موجود ہے۔

مقتول خاتون کی شناخت 26 سالہ سپنا انیس کے نام سے ہوئی ہے، نادرا ڈیٹا کے مطابق خاتون کا تعلق نوشہرو فیروز سے ہے، فوٹیج کے مطابق خاتون ممکنہ طور پر قاتل کو جانتی تھی۔پولیس کے مطابق خاتون کے سر کے پیچھے سے گولی چلائی گئی، تاہم پولیس کے مطابق جائے وقوعہ سے گولی کا کوئی خول نہیں مل سکا ہے۔

(جاری ہے)

دریں اثنا، پولیس نے جاں بحق خاتون کے اہل خانہ سے رابطہ کر لیا ہے، ورثا نے خاتون سے لاتعلقی کا اظہار کر دیا، پولیس حکام نے بتایاکہ فیملی کے مطابق سپنا شادی شدہ تھی، اور وہ مبینہ طور پر بھاگ کر کراچی آئی تھی، تاہم خاتون کب اور کیوں کراچی آئی، اس کی تفصیلات حاصل کر رہے ہیں۔

پولیس حکام کے مطابق سپنا کو سر کے پیچھے سے گولی مار کر قتل کیا گیا، تاہم کورنگی بلال کالونی پارک میں جائے وقوعہ سے گولی کا خول نہیں مل سکا، ہو سکتا ہے گولی مارنے والا خول بھی اٹھا کر لے گیا ہو۔ پولیس حکام کے مطابق فیملی نے مقدمہ درج نہ کروایا تو سرکار کی مدعیت میں درج ہوگا، پوسٹ مارٹم رپورٹ کا بھی انتظار کر رہے ہیں۔