اترپردیش میں فلسطین کے حق میں پوسٹروں پر سات مسلمان گرفتار

بدھ 23 اپریل 2025 16:17

لکھنو(اُردو پوائنٹ اخبارتازہ ترین - این این آئی۔ 23 اپریل2025ء)بھارتی ریاست اترپردیش کے شہرسنبھل میں دکانوں کی دیواروں پر’’غزہ کو آزادکرو، فلسطین کو آزادکرو‘‘ کے پیغامات والے پوسٹرلگانے پر سات مسلمانوں کو گرفتار کیا گیا۔

(جاری ہے)

کشمیر میڈیا سروس کے مطابق چند روز قبل منظر عام پر آنے والے ان پوسٹروں میں مسلمانوں سے اسرائیلی مصنوعات کا بائیکاٹ کرنے کی بھی اپیل کی گئی تھی۔

بنیاتھر کے ایس ایچ او رامویر سنگھ نے میڈیا کو بتایا کہ پولیس نے جانچ شروع کردی ہے اور سی سی ٹی وی کیمرے کی فوٹیج کی بنیاد پر سات افراد کی شناخت کی ہے۔انہوں نے کہاکہ ان دکانوں کے مالکان سے بھی معلومات لی گئیں جن کی دیواروں پر پوسٹر لگے تھے۔انہوں نے کہا کہ گرفتار افراد کی شناخت عاصم، سیف علی، رئیس، مطلوب، فردین، ارمان اور ارباز کے طور پر ہوئی ہے۔