نوازشریف سے بیرسٹر امجد ملک کی قیادت میں پارٹی رہنمائوں کی ملاقات ،ملکی سیاسی صورتحال سمیت مختلف امورپر تبادلہ خیال

مریم نوازشریف میرٹ پر آئی ہیں ، صوبے میں انکا کام نظر آرہا ہے ، وفاق اور پنجاب کی کار کر دگی قابل تعریف ہے ، نوازشریف شہبازشریف اچھا کام کررہے ہیں ، انہیں میرا اعتماد حاصل ہے،اس وقت بحالی کے مراحلے میں ہیں اگر وقت مل جائے تو اس مرحلے سے آگے ترقی کے مرحلے میں داخل ہو جائینگے ، صدر مسلم لیگ (ن)

بدھ 23 اپریل 2025 20:13

نوازشریف سے بیرسٹر امجد ملک کی قیادت میں پارٹی رہنمائوں کی ملاقات ،ملکی ..

لندن (اُردو پوائنٹ اخبارتازہ ترین - این این آئی۔ 23 اپریل2025ء)پاکستان مسلم لیگ (ن) کے صدر سابق وزیراعظم محمد نوازشریف سے وائس چیئر مین اوورسیز پنجاب کمیشن بیرسٹر امجدکی قیادت میں پارٹی رہنمائوں کے وفد نے ملاقات کی جس میں ملک کی سیاسی صورتحال سمیت مختلف امورپر تبادلہ خیال کیا گیا ۔ ملاقات کے بعد گفتگو کرتے ہوئے بیرسٹر امجد ملک نے بتایا کہ نوازشریف کی پارٹی کے سینئر حکام سے ملاقات خوشگوار رہی ،میاں صاحب بھی خوشگوار موڈ میں تھے ،انہوںنے پنجاب حکومت اور وفاقی حکومت کی کار کر دگی کو سراہا ۔

انہوںنے بتایا کہ نوازشریف نے کہاکہ شہبازشریف اچھا کام کررہے ہیں اور انہیں میرا اعتماد حاصل ہے ،مریم نوازشریف میرٹ پر آئی ہیں اور وہ صوبے میں جو کام کررہی ہیں و ہ نظر آرہا ہے ۔

(جاری ہے)

بیرسٹر امجد ملک نے کہاکہ نوازشریف لاہور میں سیاحت کے فروغ کیلئے کوشش کررہے ہیں تاکہ دنیا بھر سے لوگ لاہور پہنچ کر اس کی تہذیب و ثقافت کو دیکھیں اس سے ملک میں سرمایہ کاری ہوگی ۔

ملاقات کے دور ان نواز شریف نے واضح کیا کہ ان کی تمام تر توجہ میرٹ پر ہے اور ہر سطح پر ان کی ترجیح میرٹ ہی ہے اس سلسلے میں انہوںنے تجاوزات کے خلاف آپریشن اور قرض فراہمی سکیم کا ذکر کیا جس میں پوری طرح میرٹ پر کام کیا جارہاہے ۔انہوںنے کہاکہ ہم اس وقت بحالی کے مراحلے میں ہیں اگر وقت مل جائے تو اس مرحلے سے آگے ترقی کے مرحلے میں داخل ہو جائینگے ۔پارٹی رہنمائوں سے گفتگو میں نوازشریف نے کہاکہ میں سمجھتا ہوں کہ جہاں میری ذمہ داری بنتی ہے وہاں اپنا کر دار ادا کررہا ہوں ۔