بجلی کے شعبے کا گردشی قرضہ ختم کرنے کیلئے حکومت بینکوں سے 1275ارب روپے قرضے پر بات کر رہی ہے‘ ڈپٹی گورنر اسٹیٹ بینک

658 ارب پاور سیکٹر قرض ادائیگی‘ 400 ارب روپے سکوک بانڈ اور باقی رقم دیگر قرض کی ادائیگی پر استعمال ہو گی‘خزانہ کمیٹی کو بریفنگ

بدھ 23 اپریل 2025 20:23

بجلی کے شعبے کا گردشی قرضہ ختم کرنے کیلئے حکومت بینکوں سے 1275ارب روپے ..

اسلام آباد(اُردو پوائنٹ اخبارتازہ ترین - آن لائن۔ 23 اپریل2025ء)ڈپٹی گورنر اسٹیٹ بینک نے قائمہ کمیٹی خزانہ کو بتایا ہے کہ بجلی کے شعبے کا گردشی قرضہ ختم کرنے کیلئے حکومت بینکوں سے 1275ارب روپے قرضے پر بات کر رہی ہے‘ اس میں سے 658 ارب روپے پاور سیکٹر کے قرض ادائیگی جبکہ 400 ارب روپے سکوک بانڈ اور باقی رقم دیگر قرض کی ادائیگی کیلئے استعمال ہو گی۔

سینیٹر سلیم مانڈوی والا کی زیر صدارت قائمہ کمیٹی خزانہ کا اجلاس ہوا۔ اجلا س کو ڈپٹی گورنر اسٹیٹ بینک نے بتایا کہ پاور سیکٹر کا گردشی قرض ختم کرنے کیلئے حکومت ایک ہزار 275 ارب روپے کے قرض لینے کی بینکوں سے بات کر رہی ہے، حکومت اس میں سے 658 ارب روپے پاور سیکٹر کے قرض ادائیگی کیلئے استعمال کرے گی، اس میں سے 400 ارب روپے سکوک بانڈ اور باقی رقم دیگر قرض کی ادائیگی کیلئے استعمال ہو گی۔

(جاری ہے)

انہوں نے بتایا کہ دیگر ضروریات کیلئے حکومت 670 ارب روپے کا مزید قرض لے گی، حکومت اور بینکوں کے درمیان اس وقت مذاکرات حتمی مراحل میں ہیں۔پی ٹی آئی کے سینیٹر شبلی فراز نے سوال کیا کہ حکومت گردشی قرض کو ختم کرنے کیلئے قرض لے گی یہ قرض کتنی مدت کیلئے ہو گا پہلے قرض پر سود حکومت ادا کرتی تھی اب سود عوام ادا کریں گے، اس طرح معاملہ حل نہیں ہو گا کیونکہ اصل مسائل حل ہی نہیں کیے گئے۔چیئرمین سلیم مانڈوی والا نے کہا کہ اجلاس میں پاور ڈویژن موجود نہیں ہے اس لیے کوئی جواب نہیں دے سکے گا، حکومت صرف گردشی قرض کو ایک جگہ سے دوسری جگہ منتقل کر رہی ہے۔