حکومت کا پاور سیکٹر کے گردشی قرضوں کے خاتمے کیلئے بینکوں سے 1275ارب قرض لینے کا فیصلہ، سینیٹ قائمہ کمیٹی خزانہ میں انکشاف

بدھ 23 اپریل 2025 20:35

اسلام آباد (اُردو پوائنٹ اخبارتازہ ترین - این این آئی۔ 23 اپریل2025ء)ڈپٹی گورنر سٹیٹ بینک نے بتایا ہے کہ حکومت نے پاور سیکٹر کے گردشی قرض ختم کرنے کیلئے بینکوں سے 1ہزار 275 ارب قرض لینے کا فیصلہ کیا ہے۔ بدھ کو سینیٹ کی قائمہ کمیٹی برائے خزانہ کا اجلاس سینیٹر سلیم مانڈوی والا کی زیر صدارت ہوا جس میں سینیٹر شبلی فراز سمیت دیگر شرکا نے شرکت کی۔

اجلاس کے شرکاء کو ڈپٹی گورنر سٹیٹ بینک نے بتایا کہ پاور سیکٹر گردشی قرض ختم کرنے کیلئے حکومت بینکوں سے 1275ارب قرض لینے کی بات کررہی ہے۔

(جاری ہے)

انہوں نے کہا کہ حکومت اس میں سے 658ارب روپے پاور سیکٹر کے قرض ادائیگی کیلئے استعمال کریگی جبکہ 400ارب روپے سکوک بانڈ اور باقی رقم دیگر قرض ادائیگی کیلئے استعمال ہو گی۔ انہوں نے بتایاکہ حکومت دیگر ضروریات کیلئے مزید 670ارب روپے کا بھی قرض لے گی جس کیلئے فریقین میں مذاکرات حتمی مراحل میں ہیں۔شبلی فراز نے کہا کہ حکومت گردشی قرض ختم کرنے کیلئے قرض لے گی، یہ قرض کتنی مدت کیلئے ہوگا پہلے قرض پر سود حکومت ادا کرتی تھی، اب سود عوام ادا کریں گے۔سلیم مانڈوی والا نے کہا کہ حکومت صرف گردشی قرض کو ایک جگہ سے دوسری جگہ منتقل کر رہی ہے۔