بھارتی ناظم الامور کی دفتر خارجہ طلبی، احتجاجی مراسلہ تھما دیا گیا

بھارتی ناظم الامور کو ایک نوٹ وربیل بھی دیا گیا جس میں پاکستان کے جوابی اقدامات کی تفصیلات درج ہیں، سفارتی ذرائع

جمعرات 24 اپریل 2025 21:05

بھارتی ناظم الامور کی دفتر خارجہ طلبی، احتجاجی مراسلہ تھما دیا گیا

اسلام آباد (اُردو پوائنٹ اخبارتازہ ترین - این این آئی۔ 24 اپریل2025ء)پاکستان کے دفتر خارجہ نے بھارتی ناظم الامور کو طلب کرکے ان کے ملک کی جانب سے کئے گئے جارحانہ اقدامات پر احتجاجی مراسلہ حوالے کردیا۔سفارتی ذرائع کے مطابق دفتر خارجہ کی جانب سے بھارتی ناظم الامور گیتکا سری واستو کو طلب کیا گیا اور پہلگام واقعہ کے بعد بھارت کے جارحانہ اور یکطرفہ اقدامات پر احتجاج کرتے ہوئے ایک ڈی مارش ان کے حوالے کیا گیا۔

سفارتی ذرائع کے مطابق دفتر خارجہ کی جانب سے بھارتی ناظم الامور کو ایک نوٹ وربیل بھی دیا گیا جس میں پاکستان کے جوابی اقدامات کی تفصیلات درج ہیں۔سفارتی ذرائع نے کہا کہ دفتر خارجہ نے بھارتی ناظم الامور کو باضابطہ تحریری طور پر پاکستان کے فیصلوں سے آگاہ کر دیا۔

(جاری ہے)

ذرائع کے مطابق بھارتی ہائی کمیشن کے ڈیفنس، ایئر اور نیول اتاشی کو ناپسندیدہ قرار دینے اور پاکستان چھوڑنے کے فیصلے سے آگاہ کیا گیا۔

نوٹ وربیل میں بھارتی ناظم الامور کو سفارتی تعلقات نچلی سطح پر لانے کے فیصلوں سے بھی آگاہ کیا گیا۔سفارتی ذرائع کے مطابق بھارتی ہائی کمیشن کے عملے کو 30افراد تک محدود کرنے ،سکھ یاتریوں کے علاوہ تمام بھارتی شہریوں کو 48گھنٹوں میں پاکستان چھورنے، واہگہ چیک پوسٹ بند کرنے ،تمام بھارتی کمرشل پروازوں کیلئے فضائی حدود بند کرنے کے فیصلے سے بھی آگاہ کر دیا۔ناظم الامور کو سندھ طاس معاہدے کی یکطرفہ معطلی کے جواب میں شملہ و دیگر پاک بھارت معاہدے معطل کرنے ،پاک بھارت تجارت بشمول بلواسطہ تجارت کی معطلی سے بھی آگاہ کیا گیا۔