سوڈان ، ریاست ریور نیل میں آئی ڈی پیز کے کیمپ پر ڈرون حملے میں 11افراد ہلاک ، 22 زخمی

ہفتہ 26 اپریل 2025 12:00

خرطوم (اُردو پوائنٹ اخبارتازہ ترین - اے پی پی۔ 26 اپریل2025ء) سوڈان کی ریاست ریور نیل کے دارالحکومت الدیمر میں اائی ڈی پیز کے کیمپ پر ڈرون حملے میں 11افراد ہلاک اور 22 زخمی ہو گئے ۔ شنہوا کے مطابق ریاستی گورنر محمد البداوی عبدالمجید نے بیان میں حملے کی مذمت کی اور کہا کہ ریپڈ سپورٹ فورسز (آر ایس ایف ) کی طرف سے الموگران کے علاقے میں آئی ڈی پی کیمپ پر حملہ ایک جرم ہے جس میں 11شہری ہلاک ہوئے جن میں زیادہ تر خواتین، بچے اور بوڑھے تھے۔

انہوں نے عالمی برادری اور انسانی حقوق کی تنظیموں پر زور دیا کہ وہ ان خلاف ورزیوں کی دستاویز کریں اور ذمہ داروں کا احتساب یقینی بنائیں۔ گورنر نے بے گھر رہائشیوں کے تحفظ کے لیے کیمپ کو محفوظ علاقے میں منتقل کرنے کے بھی احکامات جاری کئے۔

(جاری ہے)

دوسری جانب آر ایس ایف نے اس حملے پر کوئی تبصرہ نہیں کیا ہے۔دریں اثنا، سوڈانی الیکٹرسٹی کمپنی کی میڈیا کوآرڈینیشن کونسل نے کہا کہ اطبارہ سب سٹیشن کو گزشتہ روزمختصر عرصے میں چوتھی بار ڈرون کے ذریعے نشانہ بنایا گیا، جس کے نتیجے میں ریور نیل اور بحیرہ احمر کی ریاستوں میں بجلی منقطع ہوگئی۔

کونسل نے تصدیق کی کہ شہری دفاع کی ٹیمیں لگنے والی آگ کو بجھانے کے لیے کام کر رہی ہیں، اور تکنیکی نقصان کا تخمینہ لگانے اور فالو اپ اقدامات کیے جائیں گے۔